Problema interno di paisnan grandi ta kita parti di atencion
*DIARIO ta sigui bati alarma pa un e menasa serio pa Aruba
*Desesperacion di refugiado lo culmina den explosion social
ORANJESTAD (AAN) — Cu lancha nan a trata di alcansa Europa, Aruba y tanto otro pais pa hopi aña.
Ciudadnan di tent y carton a wordo construi rond mundo pa duna nan loke mester a representa un dak riba nan cabez, si nan a logra yega e pais cu mester a duna nan asistencia, si nan a logra sobrevivi nan biahe.
Damanan a bira prostituta pa por a come y duna nan yiunan di come den nan condicion di refugiado cu hopi bez a haci hende honesto bira instrumento di criminalnan.
2023 ta anuncia su mes na horizonte cu culminacion di migracion como drama humano mundial, manera fuentenan cu te awor corectamente a spierta, ta bolbe adverti DIARIO.
Covid-19 a cera porta na hopi pais pa e hendenan cu mester a bandona nan pais den situacionnan inhumano pa asina a trata di sobrevivi. Pero e caravanan a continua na caminda pa un mundo, cu te awe no tin un plan total pa e drama humano social, cu yama migracion y cu ta destrui hende.
Manera informantenan a trece dilanti, na hopi ocasion e dirigentenan di paisnan for di cual nan kier huy, mes ta fomenta ocasion pa mas refugiado, cu na hopi instante ta persona cu ta contra dictaduranan di gobernantenan na mando y ta mira nan bida na peliger tambe.
Na 2022 e Guera di Ukraine a aumenta e cantidad di refugiado drasticamente pero tambe a produci un situacion mundial, cu a haci asistencia social na refugiado mas dificil.
Awe informacionnan cu DIARIO a mantene for di momentonan cu Nicolas Maduro a duna contenido maximo na dictadura na Venezuela, a keda presenta na lectornan di Aruba.
Aceptacion di refugiado ta encera no solamente un peliger di infiltracion di hende peligroso cu por abusa di e huida di refugiado pa nan tambe por drenta un pais sin papel y sin cumpli cu rekisito oficial cu ta haci control posibel.
E pais cu ta habri porta pa refugiado, mester ta capaz pa duna e refugiado pan y vivienda como simbolo di e base social cu e refugiado mester por conta cune.
Guera di Ukraine a deshaci di stabilidad mundial riba tur tereno y a baha e condicionnan social mundial.
Esaki ta haci cu paisnan grandi tambe tin un pakete di problema local pa atende cune.
Ora tuma nota con economia na paisnan manera Inglatera a basha abou, por comprende pakico e bista cu mundo tabata tin pa refugiadonan ta na peliger.
Informantenan a mustra DIARIO cu na 2023 tanto na Aruba como tur pais liber na mundo, situacionnan doloroso lo presenta debi na e cantidad di refugiado cu ya a bandona nan pais y a keda den un condicion sumamente dificil pa futuro.
Mundo lo mester atende cu un problema serio mientras no tin ningun indicacion ainda cu guera na Ukraine lo termina pero tambe cu e expansion di dictaduranan mundialmente ta yega na un fin.
Alarma grandi ta wordo bati pa Aruba tambe di parti di informantenan cu ta mustra riba e hecho cu lama ta frontera di Aruba, cu ademas ta un pais turistico, loke ta nifica cu trafico continuo di personanan di exterior loke ta pone un peso mas grandi riba seguridad di e pais.
“Aruba ta keda un lugar atractivo pa hende cu no tin cuminda y no tin cas. Pero Aruba por ofrece nan cas, cuminda y hasta cuido medico cu nan no ta ricibi adecuadamente na nan pais?” un informante a trece dilanti.
2023 lo no ta facil. Informacionnan ta mustra cu ya na Aruba tin cantidad di persona cu tabata refugiado social debi na condicionnan social na nan pais caminda nan no por regresa pa gosa di nan biehez. DIARIO ta investigando e posibilidad di problemanan social cu por presenta riba e tereno aki, mescos cu otro metodonan cu desesperacion pa haya entrada na un pais, por trece cune.
2023 lo entrega varios reto importante na hende, manera informantenan a indica y entre nan sigur e culminacion di refugiado na un momento di recesion y problemanan economico, financiero y social rond mundo.
