E berdad financiero di Aruba ta entrega oposicion debe di honor
*Democracia no ta acepta Pueblo como burico di carga di politico
*Contestanan di Benny mes ta mustra riba peso absurdo di politica
ORANJESTAD (AAN) — Ta pa democracia bira realidad na un pais, ta introduci Parlamento cu mester controla Gobierno ehecutivo riba tur tereno.
Durante e dianan cu a pasa, asombro a yena nos, ora nos a scucha declaracionnan y acusacionnan cu a topa otro.
E caso Avestruz ta basa riba uno di e kiebranan mas serio di Democracia, cu ta exigi cu ningun hende tin preferencia riba otro den bista di e gobernante, den e trabou di gobernacion y asina tambe di Parlamento y di Husticia.
Uno di e declaracionnan cu a laga nos completamente for di orbita, tabata e ponencia di Benny Sevinger cu el a firma pa Nel Oduber tambe.
Awor kico e kier bisa cu esaki? Con un homber cu tabata Ministro pa tanto tempo y awor ta Miembro di Parlamento (danki na e normanan di Mike y di AVP) por uza como excusa cu el “a firma pa Nel tambe”?
Palabranan ridiculo y absurdo segun democracia, ya cu e mester firma pa tur hende cu tin derecho riba un tereno, sea cu Nel of ta cualkier otro persona.
Loke ta na disputa ta, cu e mester mira kico e ta firma. Pakico el a firma pa Nel y pa kico el a firma pa e lista largo riba cual sigur tin Family and Friends di su partido?
Loke pa Democracia ta importante ta, si a base di ley un persona ta haya un tereno y esaki Benny Sevinger mester a percura pa socede. Punto.
Nos pregunta grandi ta, kico ta pasa cu un Pueblo si, manera Caso Avestruz ta trece dilanti, politiconan no sa kico ta nan tarea y kico ta nan responsabilidad.
Con por ta posibel cu durante tur e tempo cu Benny Sevinger tabata firma aparentemente loke pone bou su nanishi pa e firma, Miembronan di Parlamento no a bay check kico ta pasa cu tereno di Pueblo.
Den cifranan, cu Parlamento mester controla, no a bini cu duna tereno a topa cu Benny como machine automatico pa firma permiso?
No tin un bista cuanto tereno ta duna?
Tereno mescos cu placa y otro servicionan ta duna ocasion pa hende sin escrupulo abusa di placa di Pueblo pasobra tereno ta propiedad di Pueblo cu ta asset pa Gobierno.
Con por ta posibel cu no a ripara cu un proyecto tin intercambio di suelo di Aruba? Kico ta importante pa Parlamento, ta nos pregunta grandi.
Loke a pasa den e caso Avestruz ta sumamente serio pasobra Benny Sevinger tabata Ministro di e partido AVP cu mayoria den Parlamento, cu mester a conoce e personanan cu awe ta acusado den e caso aki.
Mas y mas nos ta cuminsa puntra nos mes si no mester bini cambio serio den trabou den seno di Parlamento sigur di parti di e fraccion di AVP, cu a duna nos prueba cu nan no ta controla.
Pueblo a bira e burico di carga cu 1.6 Biyon cu Mike y Benny a ricibi sin control, pa bay duna proyecto sin sigui e reglanan basico cu Ley ta exigi.
Pueblo a bira e burico di carga pa e debe nacional, cu awe ta haci cu den crisis mundial Pueblo di Aruba mester paga pa medida.
Pueblo a bira burico di carga den un Parlamento caminda a lucha pa Benny como acusado di Husticia bira Miembro di Parlamento, cu tin miembronan di AVP cu sigur mester expresa e palabranan “Mea Culpa” enfrente tur desaster cu a bati na porta di Aruba entre 2009 y 2017, ora Aruba a wordo destrui.
Con ta pone suela di Aruba na benta? Cu benta di un proyecto. Pakico miembronan di Parlamento no a nota kico ta pasa pa atende cu e ley aki?
E berdad financiero di Aruba ta entrega Parlamento un debe di honor, pasobra cu un bon control, hamas na un isla chikito manera Aruba, caminda tur politico conoce friends y family di otro pero tambe propiedad di family and friends, loke a pasa cu Avestruz, mester a socede.
