Parlamentario Muzaninn Wever:
ORANJESTAD (AAN): Semper proyectonan cu ta crece solucionnan ta wordo ricibi cu man habri sperando cu e biaha aki si lo trece beneficio pa Aruba pa loke ta trata entre otro maneho di desperdicio, riool water, y bestia morto riba caya. Parlamentario Muzaninn Wever a menciona di ta spera cu e biaha aki e mira un diferencia y a expresa cu e ta ripara cu no solamente tin contenido den e trabaonan, sino tambe un aspecto di responsabilidad social. Cu e Incinerator nobo, nos lo mira solucionnan pa e problema di maneho di desperdicio cu a existi pa hopi aña.
Segun Parlamentario Wever, aparte di e solucionnan cu e incinerator ta trece cu ne, tin e necesidad pa ciudadanonan mira e importancia y e responsabilidad tambe pa mantene nos isla limpi y cada un di nos mester haci nos parti den esaki. El a menciona cu ainda hopi ciudadano ta tira sushi riba caminda for di bentana di auto y hopi sushi ta keda acumula banda di caminda formando un bista mahos tanto pa ciudadanonan como pa turistanan.
E comportacion aki di no tene nos isla limpi, no paga pa bari di sushi y tira sushi den mondi, sigur ta crea un mal reputacion pa e isla cu nos ta stima. Segun Parlamentario Wever, den caso cu e ciudadano no por tene nos isla limpi di boluntad propio, un estimulo di ley lo ta na su luga.
