ORANJESTAD (AAN): Terra by Jeremy Ford, e concepto gastronomico distingui den Bucuti & Tara Beach Resort, a ser destaca recientemente den Forbes como un di e miho lugarnan pa cena na Aruba.
Segun e periodista di gastronomia internacional Lanee Lee, Terra ta un experiencia gastronomico di tal nivel cu por inspira como motibo pa plania un biahe den su totalidad. E reconocimiento global ta resalta e posicion di Terra como un lider den e escena culinario nobo di Aruba, mientras cu ta afirma e compromiso di Bucuti & Tara pa eleva Aruba como un destinacion di fine dining den e mapa gastronomico mundial.
Terra a ser elogia pa Forbes como “e restaurant mas menciona di isla,” y ta proclama como referencia nobo pa fine dining den e region Caribense. Segun e medio internacional, Terra ta distingui su mes pa su enfoke gastronomico sofistica y su capacidad pa eleva sabornan autentico Arubano den un estilo di cushina moderno cu impacto global.
Dirigi pa Chef Jeremy Ford (reconoci pa su Michelin Star y Michelin Green Star na su restaurant Stubborn Seed na Miami) hunto cu chefnan local Jeanclaude Werleman y Moises Ramirez y un ekipo local sobresaliente, Terra ta brinda un biahe gastronomico moderno. Ingredientenan di temporada for di nos tera y lama ta sirbi como base pa creaccion culinario cu ta refleha precision, originalidad, y un compromiso profundo pa e colaboracion cu agricultornan, piscado, y chef di e isla.
Hunto, e resort y e restaurant ta demostra cu liderato ambiental, servicio excelente, y experiencia refina por uni den harmonia perfecto bou di un standard superior di hospitalidad di luho. Ademas, Aruba ta convertiendo den un di e lidernan gastronomico den Caribe.
E reconocemento di Forbes ta enfatisa e imagen creciente di Aruba como un destinacion gastronomico, mientras cu ta sigui reforsa e liderato global di Bucuti & Tara den crea experiencianan di biahe eleva.
