Colaboracion como yabi pa Impacto Sostenibel
ORANJESTAD (AAN): Informacion procedente di Hulanda, ta indica cu recientemente Diasabra 24 di januari 2026, e proclamacion di Federacion Afro Diaspora Netwerk (FADN) a tuma luga na Biblioteca Publico di Amsterdam.
E federacion, funda riba 31 di October 2025, a marca un capitulo nobo den organizacion colectivo y colaboracion den Afro-diaspora. Cu e mision di uni organizacionnan, iniciativa y comunidadnan, FADN ta posiciona su mes como un plataforma fuerte pa defende interesnan economico, social y cultural. Un bos, forsa comparti.
E evento a tuma luga den contexto di World Day for African and Afro-descendant Culture, un dia cu UNESCO a declara den 2019 pa honra rikesa afro-cultural y contribucionnan di afrodiaspora mundialmente. E fecha tambe ta referi na adoptacion di Carta pa Herensia Cultural di Africa den 2006. Durante e programa, e miembronan di Comision di Desaroyo & Investigacion a wordo presenta: señor Van Ampt, señor Hellings, señora Vijzelman y señor Van Bosse. Nan a hunga un rol activo den fundacion y desaroyo contenido di e federacion.
Oradornan: Dr. Barryl Biekman a presenta e fundacion di FADN for di un perspectiva panafricanista y a duna recomendacionnan constructivo pa reforza conexion entre e federacion y e campo di trabao. Dr. Miriam Ekiudoko (Hungaria) a pone e evento den perspectiva di meta y principionan di Dia Mundial pa Afro-Cultura y Afro-Diaspora. Meta
E Federacion Afro Diaspora Network (FADN) tin como meta representa, reforza y conecta
organizacionnan Afro mundialmente, cu atencion special pa Hulanda, e parti di Caribe Hulandes, Surinam y otro regionnan di diaspora. Ademas, e federacion ta promove derechonan igual, husticia social, reconocemento cultural, auto-determinacion y desaroyo economico, y ta sirbi como interlocutor pa organizacionnan afilia den contacto cu stakeholdernan nacional y internacional.
Señor Iwan Leeuwin (presidente) y señora Connie Arnoldus (secretario) a duna un clarificacion
mas detaya tocante e mision, vision y metodo di trabao di e federacion. Mas informacion por
worde haya na www.federatie-adn.org.
