SPEEDWORLD 28-09-2024

SpeedWorld cu boso amigo Hubert ‘Furai’ Tiel.  Nos tabata di bishita Diasabra riba International Raceway Park Palo Marga,

pa check e actividad cu a carga e nomber “The Real Deal”, organiza pa Destroyer Racing.

   Esaki ta un actividad organiza pa e conocido Jayson Geerman, tambe McMonti di Curaçao, y  William “Bill” Berg, kende ta doño di Rocketbilly Racing. Riba e pista renoba y certifica di Palo Marga a tene careda cu a hala atencion di publico.  Tambe tabatin show di Drifting.  Fuera di esey, a presenta cu un auto hopi compacto, pero cu motor potente aden.  Ta trata aki di un Jet ‘Smart’ Car, cu a saca hopi huma, candela y sonido.

   Tambe a tene show di diferente rider y e Jet ‘Smart’ Car tabata despues di e caredanan di Dragrace.

   Minister di Deporte Endy Croes a haya e chens di bay sinta den auto hunto cu Yavin Croes,  un fabuloso driver cu a yuda Ministro “experimenta e dushi adrenalina” cu un auto di Drift por produci.

   SpeedWorld ta mira cu keto bay deporte di careda di motor ta keda atrae hopi fanatico.  Pesey mes e tribunanan tabata completamente yen y cu e tremendo trabou di Patrick Geerman, pa anuncia cada categoria y cada tempo cu cada vehiculo tabata marca.  Tur esey a haci di e anochi aki uno hopi agradable.

  Organizador a haci entrega di plaquette na diferente persona como reconocemento, y esnan cu a ricibi esaki tabata Louimar ‘Loui’ Jarzagaray, e hoben Yavin Croes, William ‘Bill’ Berg, y Ministro Endy Croes.

   Te aki pa e siman aki!  Corda shonnan, respeta leynan di trafico y nevermind pusta riba Green Corridor of WVB Boulevard!  Bay Palo Marga pa haci esey!