Speedworld 21 DEC 21

Un saludo cordial na mi lectornan di Speedworld!  Ya nos ta den antesala di Pasco, y pesey un biaha mas, bo amigo Hubert ‘Furai’ Tiel ta desea boso un dushi dianan di Fiesta.

  Hey mira aki!  Esnan di Aruba Mustang Club a tene nan tradicional Christmas Dinner 2021.

   E miembronan a sinta y reflexiona cu sigur nan ta lagando atras un 2021 cu no tabata uno facil, specialmente mirando cu e Car Clubnan di Aruba ta semper consisti di grupo di personanan hopi uni, y cu ta gusta e asunto di por sali hunto y goza den grupo cu nan vehiculonan.

   No obstante reglanan estricto den 2021, asina mes toch nan a haya aki-aya un chens di sali dal un rondje cu nan auto y asina disfruta di loke e grupo ta para pe.  Pa Aruba Mustang Car Club, no ta un excepcion.

   Diadomingo sinembargo, e grupo aki a ruini hinto pa asina disfruta di un suculento Christmas dinner y for di aki caba, Aruba Mustang Car Club, kier a manda palabra di feliz dianan di fiesta, pa tur hende, specialmente pa tur e otro Car Clubnan di Aruba y sigur, sin por laga afo, nan a gradici Hubert Tiel di Speedworld, kende henter aña tabata cla pa cubri e eventonan di e clubnan y Diadomingo cu tabata su extra off day, tog a dicidi pa bin cubri e Christmas dinner di AMCC.