Despues cu nan casi a perde speranza --- ORANJESTAD (AAN) – E siman aki DIARIO a ricibi un par di yamada di personanan cu a habri e siman aki cu e grato sorpresa,
cu nan a haya FASE di November, despues cu nan a kere cu no ta bay haye mas, mirando cu e fechanan custumbra pa pago, a pasa sin cu nan a ricibi e suma.
Ta trata di personanan cu kier a yama danki, y a bisa cu berdaderamente nan tabata tin mester di e suma di FASE sikiera e ultimo bez aki, pasobra ainda nan no tin trabao y alomenos asina por paga gastonan manera awa y coriente, y cumpra algo di cuminda. No tur hende cu ta haya FASE a inscribi na Fundacion pa Comunidad, of a haya bijstand acerca, manera un informacion di DAS mes a crea e impresion, pasobra un grupo kizas chikito a probecha di pidi otro entrada riba cual no tabata tin derecho. Pero danki Dios, un di e personanan cu a tuma contacto cu redaccion a bisa, cu ora hende ta actua cu honestidad y un actitud gradici, Dios mes ta percura pe. Pues, ta palabranan di gratitud na gobierno y tur esnan envolvi den e otorgamento di FASE, cu nan a haya e grato sorpresa riba nan cuenta di banco, cu por cierto, tabata full bashi.
Pa ultimo, tabata tin palabranan di fe y speranza pa tur esnan cu a haya FASE y ainda no tin trabao, conciente cu e beneficio aki lo no tey mas na 2022, pero pa banda di pidi Dios pa yuda nan, sigui haci nan maximo esfuerzo pa haya un trabao, maske e mercado laboral no ta ofrece tur e posibilidadnan relaciona cu loke nan tabata haci prome cu Covid-19, unda hopi tabata eherce un profesion, incluso di servicio esencial, pero cu toch nan a perde trabao door di e “no work no pay” cu a wordo permiti. “No obstante, no perde speranza, cu pa Dios nada ta imposible” un dama a expresa.
Potret aki ta uno di archivo.
