ORANJESTAD (AAN): E operacion di diferente pais cu ta vigilando loke ta moviendo riba Lama Caribe, ta sigui produci exito den garamento di contrabando di droga.
E operacion multinacional cu diferente agencia, hunto cu autoridadnan di Merca cu ta yuda den e vigilancia, a pone cu autoridad a logra di confisca 706 kilo di cocaina cu tabata wordo transporta abordo di un speedboat tipo GoFast riba lama grandi como 260 km noordwest di Aruba.
Tur cos a cuminza ora cu un avion di vigilancia di Armada di Colombia, y un Plataforma Aereo di e Joints Inter Agency Task Force South (JIATFS) di e Southern Command di Merca, hunto cu unidadnan riba lama di Colombia, a detecta e speedboat aki. Nan a detecte ta saliendo for di La Guajira y ta tuma direccion panort, claramente rumbo pa Republica Dominicana.
Unavez cu a identifica e rumbo cu e GoFast aki ta tumando, a manda un unidad di Rapid Response di Guardacosta Colombiano, pa asina bay intercepta e boto aki. Nan a logra y despues di un persecusion chikito a logra stop nan. Abordo di e GoFast tabatin un Colombiano y tres Venezolano, y hunto cu nan tabatin 27 bulto grandi cu paki di cocaina den nan.
E speedboat hunto cu e droga y e tripulantenan a wordo treci bek pa tera, pa asina haci e proceso di investigacion. A test e droga, cu a resulta di ta 100% cocaina, y e pakinan hunto a logra un peso di 706 kilo. Esaki tin un balor di 23 miyon Dollar riba mercado ilegal internacional. E potret aki pa cortesia Armada Colombiano.
