Premier Wever-Croes gradici cu UA:
ORANJESTAD (AAN) – Minister Presidente Evelyn Wever-Croes, tabata presente na e charla ofreci pa “Center for Lifelong Learning” (CLL) den aula di Universidad di Aruba, y DIARIO tabata tin un entrevista cu e Premier.
Minister presidente a expresa, cu naturalmente, na caminda pa Dia Internacional di Hende Muher, Dia 8 di Maart, ta hopi importante pa wak cada biaha, cuanto avance tin riba e tereno aki.
“E aña aki, e approach cu nos a tuma ta bishita diferente Instituto pa nos combersa, dialoga, cu studiantenan. Esnan cu ta traha, den e caso aki na Universidad, pa mira con avanza nos ta riba e tema aki. Mi sa cu danki na e generacionnan prome cu nos, nos tin practicamente den tur area, mesun oportunidadnan cu hende homber”, Minister Presidente a bisa.
E dignatario a subraya cu hende muher na Aruba a logra hopi, y cu e ta hopi agradecido na e generacionnan antecesor cu ta habri porta pa e siguiente generacionnan.
Prome Minister a señala cu e sa cu esaki no ta bay keda asina automaticamente. Tin profesionnan pa den futuro, cu nos no ta conoce ainda, pero e sa si e necesidadnan pa ekipa nos hobennan pa e profesionnan ey. E mandatario a bisa cu ta conoci tambe, cu hopi di nan ta rond di digitalisacion, automatizacion, etc. Y nos mester ta sigur cu nos hobennan y nos sernan femenino tambe, tin interes den e areanan aki, pasobra si no nan por keda atras, y nos ta perde tur avance cu a wordo logra aworaki, danki na esnan cu a lucha prome cu nos.
“Pesey e dialogo aki, pa wak con nan ta mira digitalisacion, con confortable e studiantenan femenino ta sinti cu digitalisacion y automatizacion, pa nos mira y nos por comproba cu nos ta riba e bon caminda”, Premier Wever-Croes a señala.
E dignatario a señala cu tambe por mira cu tin cierto circulonan eyfo cu no tur ora ta logra kibra nan. Esey mester di extra atencion, door di pone enfasis riba posibilidadnan nobo cu tin, por ehemplo den digitalisacion. “Mi ta spera cu esey ta yuda un hoben cu por ta den e circulo ey kibra esaki. Bay riba su propio caminda, desaroya su mes y ta exitoso den bida. Con cu bay bin nos tin cu realiza cu e forma con nos mayornan y welanan a atende cu retonan di bida, no ta di e tempo aki mas y nos tin cu atende cu e retonan na otro manera”, el a remarca.
Minister Presidente ta hopi gradici cu Universidad di Aruba, cu tin e facultad nobo di System cu ta prepara nos hobennan riba e tereno aki. “Nos sa cu Universidad ta hopi stima pa e studiantenan femenino tambe, pasobra akinan no por bisa cu nan ta wordo exclui. Kiermen, Universidad di Aruba ta hunga un rol hopi importante den esaki y mi ta hopi contento cu esey”, e mandatario a recalca.
