Otro siman tin anochi informativo pa esnan interesa
ORANJESTAD (AAN): Abo ta entre 18 y 30 aña di edad y bo tin un paspoort Hulandes valido? Bo no ta sigur kico pa haci despues cu bo gradua? Bo kier siña conoce bo mes mas miho? Bo kier siña habilidadnan nobo?
Si tur bo contesta ta un SI! CEDE Aruba por ofrecebo e oportunidad unico aki!
EU Projects di CEDE Aruba tin diferente proyectonan boluntario na Europa pa hobennan entre 18 y 30 cu ta ser financia door di Union Europeo.
Pesey DIARIO a compronde, cu riba Diaranson 8 di maart 2023 pa 6’or di atardi na Biblioteca Nacional lo tin un session informativo tocante e proyectonan aki.
Nan kier invita tur hoben cu ta interesa pa sa mas di e oportunidadnan unico aki pa nos presentacion diaranson!
CEDE Aruba ta financia via European Solidarity Corps (ESC) pa cubri e gastonan di mas grandi pa tur hoben cu ta interesa pa bira boluntario. Esaki ta inclui gastonan di biahe, acomodacion y cuminda durante ful e proyecto. Perfecto pa hobennan cu kier tuma un ‘gap year’ den nan estudio, of prome cu sigui studia of busca trabao.
Abo of un hoben cu bo conoce ta interesa? Spera di wak bo na nos session informativo! Pa mas informacion of pregunta tocante CEDE Aruba y proyectonan boluntario na Europa, manda un e-mail pa This email address is being protected from spambots. You need JavaScript enabled to view it., of manda nan un WhatsApp na 561-9666.
