Sorpresa pa Dylan Giel durante les na Colegio Arubano

ORANJESTAD (AAN): E siman aki, representantenan di IBiSA y tambe Patrishi Sports a haci un bishita na Colegio Arubano,

y nan a haya sa den cual lokaal e momento ey e hoben atleta Dylan Giel ta hayando les.

   Asina nan a cana bay y yega, drenta e klas pa asina na un forma unico, presenta e Bib #1 na e lider di uniform berde, e fenomeno hubenil Dylan Giel di Sportsz4U Triathlon Academy.

   E ceremonia a tuma lugar den lokaal ey mes hunto cu su docente, demas amigonan di klas, y hasta Rector Tim Croes tabata presente.

   Dylan ta un hoben cu ta sobresaliendo den caredanan, constantemente ta kibrando record y hisa nivelnan.  Di e 7 evento den temporada di 2024 aki, Dylan a gana 4 careda y a ubica su mes den e Top 3 di puestonan.  Dylan tin plan di logra victorianan grandi den deporte y esaki ta e reconocimento di e trabao duro cu e ta bin ta haciendo.

   Sigur comunidad di Aruba tin di para banda di caminda y grita ora bo mira Dylan pasa, pasobra e ta sigui inspira atletanan hoben rond di e isla.

   Corda cu Diasabra awor, 22 di Juni 2024, tin e ‘IBiSA Olympic Day Kids & Youth Run organiza pa IBiSA Aruba, Comite Olympico Arubano, y Aruba Bank NV.  Esaki ta e evento di mas grandi di coremento pa hobennan na Aruba, y pueblo ta ancioso pa mira e atletanan nobo aki logra victorianan nobo y bin cu recordnan nobo.

   Na final tur hende den klas a saca potret hunto cu Dylan.