Mimi Ponson ta spera cu AZV ta yama nan pa sinta pronto:
ORANJESTAD (AAN) Mimi Ponson, presidente di Asociacion di Fisioterapista, den entrevista cu DIARIO a splica cu pa cada malesa cu ta rekeri di Fisioterapia, ta rekeri di un cierto cantidad di tratamento, cu e pashentnan tin derecho riba dje.
Mayoria di e kehonan di salud normal, cu e pashentnan tin, manera problema cu spears, ta haya nuebe sesion, pero ora ta trata di casonan mas serio e pashent ta haya un poco mas.
Pero si e pashent ta haya su nuebe sesion y bolbe haya mesun cos, e no ta haya tratamento mas, pero e tin cu warda henter un aña pa bolbe haya tratamento.
Depende kico e pashent tin, e por haya tratamento un of dos biaha pa siman, y den casonan mas extremo, tin biaha 3 bez pa siman. Pero normalmente ta un of dos sesion pa siman.
Un di e gruponan di pashent mas grandi cu ta ricibi servicio di Fisioterapia ta e adultonan mayor. Mimi Ponson a indica cu depende di kico nan tin, nan por haya prioridad. Casonan mas erg, por ehemplo di hendenan cu ta haya stroke ta wordo trata mas lihe. Tambe pashentnan cu a wordo opera, of casonan di fractura.
Cada pashent ta scoge na cual fisioterapista e ta bay. “Bo ta liber pa scoge entre e 26 fisioterapistanan ken cu bo kier, na unda bo kier bay, ta na e persona si e kier bay riba lista di spera of si e kier warda. Ta su derecho, nos no tin ningun problema pa pone hendenan riba lista di spera, si nan ta dispuesto pa warda. Pero nos ta splica nan si, cu e lista di spera ta un tiki largo cu nan tin cu bay warda un par di siman”, Mimi Ponson a comenta.
Mimi Ponson a subraya cu no tin, y no mag di tin diferencia riba lista di spera, si e pashent ta asegurado di AZV of pashent priva (cu ta paga).
Ademas, e volumen di pashent cu e terapistanan ta haya mas tanto, ta di AZV. E tratamento ta costoso y hopi hende no tin moda pa pague, anto e no ta conform hopi cu hendenan ta paga cerca nan.
Finalmente, Mimi Ponson a expresa cu nan ta haci nan maximo esfuerzo. “E sistema con nos ta trata mi ta kere cu toch ta e manera mas eficiente cu nos por traha na e momentonan aki. Nos man ta un poco mara, y nos ta spera cu AZV lo yama nos cu nos por bay sinta cu nan pa e asunto aki wordo soluciona, pasobra pa nos tambe ta hopi fastioso. Pa nos ta hopi fastioso cu un pashent ta yama bisa nos cu e tin hopi dolor y nos bise cu te aki ocho siman mi por yude, ta erg pa nan y pa nos. Y ta lamentable cu e situacion ta asina aki”, Mimi Ponson a reitera.
