ORANJESTAD (AAN): Diasabra 26 di september, Soroptimist International Club Aruba (SICA) a organisa un charla special
bou di e tema “Marine Waste & Pollution”, presenta pa environmental scientist, educador y social entrepreneur Christie Mettes, cofundador di Metabolic Foundation.
E actividad a forma parti di e preparacionnan di SICA pa e campaña internacional Orange the World, cu ta tuma luga anualmente di 25 di november te cu 10 di december, cu e meta di crea conscientisacion y contribui na e lucha contra violencia contra hende muhe y mucha muhe.
E aña aki, Soroptimist International Club Aruba a scoge pa pone un enfoke special riba sostenibilidad y su conexion cu bienestar, siguridad y resiliencia den comunidad. Mediante diferente actividad, e organisacion kier cultiva conscientisacion, compromiso, responsabilidad y conexion, mientras cu e ta inspira comunidad pa adopta practicanan sostenibel cu por contribui na un futuro mas sigur y digno pa tur hende muhe y mucha muhe.
Durante e charla, Christie Mettes a comparti su conocemento y experiencia amplio tocante contaminacion marino, desperdicio y e impacto cu actividad humano tin riba nos ecosistema. E presentacion a pone enfasis riba e importancia di responsabilidad individual y colectivo pa proteha nos ambiente.
Aruba su lama, playanan y rifnan ta parti esencial di nos identidad, economia y calidad di bida. Sin embargo, nan ta enfrenta diferente reto relaciona cu contaminacion y desperdicio. Segun e mensahe principal di e charla, proteccion y restauracion di nos ambiente no ta responsabilidad di un solo organisacion, sino di henter comunidad.
Pa SICA, e concepto di sostenibilidad ta bay mas leu cu proteccion di naturalesa solamente. E ta inclui tambe e manera cu comunidadnan ta cuida otro, crea espacionan sigur, fortalece resiliencia y promove respet y dignidad. E balornan aki ta forma un puente natural cu e meta di Orange the World: un sociedad unda hende muhe y mucha muhe por biba liber di violencia.
Soroptimist International Club Aruba ta expresa su gradecimento na Christie Mettes pa comparti su conocemento y experiencia, y pa inspira e participantenan pa mira nan mes como agente di cambio den cuido y restauracion di nos ambiente.
E organisacion ta gradici tambe tur persona cu a participa den e charla y tur miembro di SICA cu, cu nan apoyo y dedicacion, a contribui na e exito di e actividad.
Cu e charla aki, Soroptimist International Club Aruba ta sigui construi e caminda pa Orange the World 2026, cu e conviccion cu un futuro mas sostenibel, resiliente y sigur ta uno cu nos mester crea hunto.
