‘E wega aki nos ta bay gan’e’
ORANJESTAD (AAN): “Esaki ta e tempo di relevo.” Cu e palabranan aki, presidente di Partido AVP, Clifford Heyliger, a haci un yamada na tur miembro pa participa na Congreso di Partido diasabra 4 di october, di 9:00 am pa 11:30 am na Marriott Ballroom. Durante e congreso lo trata cambionan den Statuut y e relevo di liderazgo cu lo marca e siguiente capitulo di AVP.
Papiando Dialuna mainta na Cas di Partido, Heyliger a subraya cu e congreso ta mas cu un momento organizatorio. “Ora nos ta papia di cambio di liderazgo, no ta pa show. Nos ta prepara un team di relevo cu tin e capacidad pa sigui e trabao, mantene e avance y yega na final cu exito.”
Segun Heyliger, e fundeshi Cristian democrata di AVP ta keda e guia di partido. Durante mas di 80 aña, AVP a pone atencion special riba hende vulnerabel y famianan cu tin necesidad.
El a menciona con AVP tabata esun pa redobla pension den pasado y e esfuersonan actual pa alivia presion di inflacion riba pensionadonan. Tambe el a destaca e meta pa acerca salario minimo na bestaansminimum, pa hende por biba dignamente sin mester di tin dos of tres trabao.
Heyliger a compara e organizacion di AVP cu un monumento cu tin historia y balor. “Bo no ta cambia un structura bon traha. Bo ta cuid’e, manten’e y sigui construi riba dje.” E relevo, el a bisa, ta pa preserva e historia di partido y sigui traha pa un Aruba caminda progreso y bienestar di berdad ta yega na tur hende.
Cu un analogia di baseball, presidente di AVP a invita miembronan pa bin forma parti di e siguiente etapa: “Nos kier pa pueblo sa cu e wega aki nos ta bay gan’e.” Pa logra esey, nos mester un team fuerte, prepara y uni. Dia 4 di october, cada miembro tin un luga den e team ey. Nos ta warda bo.
