Soroptimist International Club Aruba ta bira un realidad pa nos hendenan muher

Vanessa Holander y Nora Eleonora:

ORANJESTAD (AAN) – Vanessa Hollander y Nora Eleonora, tambe a hiba palabra durante e conferencia di prensa yama pa “Soroptimist International Club Aruba”.

Vanessa Hollander a haci un introduccion den e conferencia di prensa, expresando cu aworaki si e Soroptimist International Club Aruba, ta den e punto cu ta bay wordo inaugura. El a señala e presencia di diferente miembro di varios pais rond mundo, cu tabata presente durante e conferencia di prensa aki.

Seguidamente, el a pasa palabra pa Nora Eleonora, ken ta presidente di Soroptimist International Club Aruba.

Eleonora a splica cu e instalacion di Soroptimist Club Aruba lo bira un realidad Diasabra 8 di October aki, y a subraya cu esaki ta un realidad indispensable den e bida di hende muher, na mundo.

El a señala cu e club aki ta un red social, di hende muher profesional y negociantenan. El a menciona cu e mes tin diez aña di ta miembro di e club internacional aki, y el a menciona cu e dia aki tin rumannan cu a bin Aruba for di Curacao, Suriname, Polonia, Sweden, Hulanda y Alemania.

“E club internacional aki ta pa hende muher, y tin e meta di mehora y sostene e hende muher, y e mucha muher, na mundo.

Awe, nos tin tur nos rumannan cerca nos, pa yuda nos y sostene nos den e Club Internacional aki.  E ta wordo organiza asina aki: Tin cinco Federacion, un di Africa, un di Pacific, un di Europa, un di Merca, y un di Sydney cu ta na Inglatera y Irlanda.

Nos ta cay bap e UNI Hulanda. Kiermen, Hulanda tin 101 club y cu Aruba ta bay bira 102. Nos ta bay tin tres evento. Awe, dia 6 di October tin e happy hour di bon bini pa tur nos rumannan cu tey; nos tin e ‘Meet the President’ di Europa, cu a bin honra nos; y e ‘Meet the President’ di Hulanda. Tambe nos tin e inauguracion Diasabra, cuminzando for di 10 or. Nos di Aruba ta mira e poder di uni cu tur e otro clubnan di servicio aki na Aruba, pa asina nos cuminza conhuntamente, traha hunto cu otro pa e hende muher na mundo, y naturalmente nos hendenan muher y e mucha muher, na Aruba”, Eleonora a relata.

El a anuncia e presencia di e Presidente di e Federacion y e Presidente di e Uni, tambe un Mentor y e rumannan di Suriname y Sweden cu a hiba palabra.