Momento alegre ora cu Grupo Kawara a haci bishita na Parlamento

ORANJESTAD (AAN): Parlamentario Shailiny Tromp-Lee a comparti cu DIARIO, algun potret di un bishita importante cu nan a ricibi e siman aki na Parlamento.

   “Sigur un bishita importante caminda nos por a comparti cu nos grandinan, scucha loke ta preocupa nan y intercambia di idea. Di mi banda mi a gradici nan pa nan aporte na crea e Aruba di awe y pone pa nos e fundeshi cu ta haci awe tur cos posibel,” Tromp-Lee a bisa.

   Alavez mi a indica cu nos ta preocupa pa e situacion encuanto poder di compra y retonan cu nan ta encontra diariamente. Mi a comparti cu nan cu mi ta di opinion cu nan merece un bida digno y cu pesey mes nos Fraccion ta constantemente den contacto cu Gobierno encuanto e reformanan andando caminda nos ta urgi pa tene debido cuenta cu e grupo meta aki.

   Durante e encuentro aki cu nan mi a accentua e hecho cu pa Gabinete Wever-Croes nos grandinan ta hopi importante y recientemente hasta a lanta un Departamento special dirigi riba nan. Alavez mi a comparti cu nan un recapitulacion specifico di parti di e reforma fiscal cu ta trata nos pensionadonan: (*) Pensioen di biehes lo aumenta entrante 1 Januari 2023 cu 35 Florin pa luna.  (*) Reparatie toeslag di pensionado lo aumenta entrante 1-1-2023 cu 45 Florin pa luna.  (*) Tarifa di impuesto riba pensioen ta baha cu 2% entrante 1 Januari 2023.  (*) Suma liber di impuesto ta aumenta te na 30.000 Florin (2.500 pa luna) entrante 1 Januari 2023, kiermen solamente esnan cu tin un pensioen mas halto cu 30.000 lo paga impuesto, y den e caso ey e tarifa lo worde reduci.  (*) Peso di impuesto riba pensioen di parehanan casa lo bira menos entrante 1 Januari 2023, pasobra lo no conta nan hunto mas.

   E bishita aki a yena nos cu energia y mi por bisa cu sigur e tabata un bishita hopi ameno cu a brinda nos e oportunidad pa por combersa cu e miembronan di e Grupo Kawara.