Na Mei 2017 Reino tabata prepara pa caida economico Aruba den desaster financiero - *Documentonan oficial di Hulanda ta entrega realidad di reto formacion 2017 - *Palabranan skirbi di Plasterk y pasonan di firmesa di Evelyn Wever-Croes
ORANJESTAD(AAN)—Formacion di un Gobierno nobo pa Aruba ta den su fase final.
Mientras e partidonan MEP y RAIZ ta continua cu e proceso electoral 2021-2025, DIARIO mester bolbe na 2017 ya cu tur loke a pasa durante gobernacion di Gabinete Wever-Croes 1 y lo mester pasa durante Gabinete Wever-Croes 2, ta basa riba e realidad di 2017 cu e gran mayoria di Aruba no conoce.
Cu un mayoria minimo Gabinete Wever-Croes casi a yega eleccion 2021 loke tabata impresionante si comprende loke realmente e responsabilidad gubernamental tabata.
Documentonan oficial di Tweede Kamer y Gobierno Hulandes for di prome parti di 2017 ta splica e realidad di Aruba, cu Pueblo di Aruba mes no a realisa.
Politiconan Hulandes, critico di e gobernacion cu tabata wordo hiba den e partinan Caribense di Reino, tabata enfrenta Ministro Plasterk, e gobernante Hulandes cu na 2014 a bini Aruba pa enfrenta ex Prome Ministro Mike Eman y impone supervision Hulandes.
E herencia di Gabinete Evelyn Wever-Croes na 2017, ta wordo bon splica si tuma nota di por ehempel e carta cu e miembro di Parlamento Bosman a manda pa Ministro di Relacionnan den Reino, Plasterk pa asina ricibi informacion concreto riba e peliger grandi pa economia y bida na Aruba forma dor di e proyecto Citgo.
Na Juli 2017, Ministro Plasterk a contesta preguntanan di Bosman riba e situacion na Aruba y asina ta bira uno di e fuentenan cu ta yuda Aruba comprende, e herencia economico cu Gobierno Mike Eman a entrega na Gobierno Wever-Croes ademas di e calamidad financiero.
E carta di Bosman tabata directamente mara na e hecho cu ta tabata tin duda serio den e proyecto Citgo pero tambe miedo pa loke esaki lo a bira pa Aruba.
E peliger cu Bosman a describi a bira realidad di Aruba cu a mira e fantasia economico di Citgo rementa.
Segun e carta di Minister Plasterk, na 2017 economia di Aruba lo mester a crece segun pronostico di Banco Central cu 3.4 porciento. Si e proyecto Citgo no a habri na 2017, economia di Aruba lo a crece cu 1.4 porciento na 2017.
Esaki lo a nifica cu lo mester a bini un forma pa aumenta entrada, cu manera Plasterk a trece dilanti lo tabata mas belasting cu Aruba lo mester a paga.
Plasterk, pues for di Juli 2017 a mustra cu e comision di supervision Hulandes, tabata sigui e desaroyonan na Aruba, ya cu e riesgo di fayo di e proyecto pa e isla chikito lo tabata enorme, manera Plasterk a splica e Miembro di Tweede Kamer Plasterk.
Ademas a wordo mustra riba resultadonan di caida di turismo for di Venezuela, cu Aruba a logra sobrevivi debi na e calamidad di horcannan den region di Caribe cu a haci cu mas turista a scrap otro destinacion y bini Aruba.
E carta di Plasterk a bati alarma pa un posibel desaster economico pa Aruba, cu a bira realidad pa Gobierno Wever-Croes cu a hereda no solamente e Rapport Bo Aruba cu debenan enorme di e fondo di 1.6 Miljard cu Benny Sevinger a tene scondi den su lachi.
Ora Evelyn Wever-Croes a forma e gobierno cu Mike Eman no kier a forma na 2017, el a acepta responsabilidad pa subi caminda di gobernacion di un pais financieramente bancarota, cu cantidad di debe, pero tambe den un desastre economico provoca pa e fantasia di Citgo.
E forma cu Hulanda a sostene Gobierno Wever-Croes financieramente y na 2020 a duna Aruba un luga unico den negociacionnan pa asistencia pa un debe sin interes pa Aruba por recupera di su herencia financiero y di e pandemia Covid-19, ta debi na e hecho cu Hulanda tin tur prueba di loke a pasa durante Gobierno Mike Eman.
Awe Aruba ta forma un Gobierno pa sigui riba un caminda, cu manera semper DIARIO a trece dilanti, a haya un punto di salida na 2017, ora ya Gabinete Wever-Croes 1 a guia Aruba riba un caminda nobo, a tuma medida cu for di Juli 2017 Hulanda a adverti cu lo bini na Aruba cu ya tabata tin un plan di recuperacion pa 2020, ora Covid-19 a presenta pa awe dicidi tambe riba e puntonan di salida pa un gobierno den futuro.
