Fundacion ta buscando 20 hoben pa yuda nan
ORANJESTAD (AAN): Bo yiu ta henter dia na cas, sea sinta tras di tablet of su gaming-computer ta hunga henter dia online gaming, y no ta ni mustra interes di sali pa bay busca trabao of algo otro di haci.
E ora e coach Jalken Antonia tin bon noticia! No ta importa si bo yiu a druip na scol, of a djis bandona scol. E tin e solucion cu lo por bay pone nan haya un trabao tambe.
“Nos ta buscando hobennan di entre 18 y 28 aña cu ta haciendo nada na cas,” Jalken Antonia di Fundacion Ja Ik Aruba a declara recien den un entrevista cu DIARIO. Esaki nifica cu su fundacion ta buscando un total di 20 hoben local pa aplica na nan programa.
Jalken a indica cu e ta buscando hobennan cu aworaki no ta bay scol mas, y no tin trabao. (Bo mag di tin side-job si). E participantenan no tin di paga nada pa drenta den e programa. Loke nan ta pidi di e hobennan ta pa nan dedica nan mes na e programa, y pa nan ta serio durante e programa.
E programa cu e ta papiando aki di dje yama ‘In The Picture”, y e Fundacion a bin cu esaki pa hendenan hoben y adultonan hoben cu lo bay haya coaching y entrenamento pa nan bira resiliente, independiente, confia den nan mes, y bira autonomo. Hecho si ta cu bo mester tin 18 te cu 28 aña di edad.
E programa ‘In The Picture’ lo pone e hobennan haya sa mas di participacion laboral, orientacion vocacional, y habilidadnan vocacional. Door di proactivamente pone e hobennan riba participacion laboral, orientacion profesional, y habilidadnan di training profesional, via di hermentnan traha specialmente door di Fundacion Ja Ik Aruba, y sosteniendo di e forma ey pa cera e buraco entre e percepcion di Generacion Z y e realidad den mundo di negoshi.
Loke e hobennan lo bay siña ta liderato personal. Aki e participantenan por maneha nan mes basa riba nan vision y motivacion personal pa mehora den nan bida. Tambe lo siña con pa bira doño. Pues lo bay sinti nan mes responsable pa nan regalo y talento cu nan tin, y si ta necesario, con pa haci aun mas esfuerzo pa duna mihor prestacion. Jalken a stress e importancia di atende e hobennan aki tambe 1-on-1 y di e forma ey pushanan den e caminda pa nan siña con pa lidera nan mes tambe. Tambe lo bay papia riba Entrepreneurship, unda participantenan lo bay identifica oportunidadnan y actua rapidamente riba esey.
Deadline ta aki 1 siman y mey, y corda cu e Fundacion tin solamente cupo pa 20 hoben. Si abo conoce un hoben cu a drop out di scol, no a haya diploma nunca, y ta sin trabao y sin gana di busca trabao, por fabor dune apoyo pa e contact e Fundacion aki y purba su suerte cu ‘In The Picture’. Por manda email na:
This email address is being protected from spambots. You need JavaScript enabled to view it.
Of tambe por yama e Fundacion na 744-0625. Jalken Antonia ta spera cu mayornan cu no sa mas kico pa haci cu nan yiu pa haya trabao, pa probecha di e oportunidad unico aki. E Fundacion a haya fondo pa traha cu e hobennan aki, pues no perde e chens.
.
