Varios efecto mundial ta pone prijs di crudo subi
ORANJESTAD (AAN): Awe ta di dos Diaranson di luna, esey nifica cu ta ahusta prijs di combustibel riba e isla.
A sali na cla, cu gasolin ta subi awe cu casi 15 cen pa liter.
Minister di Asuntonan Economico, Comunicacion y Desaroyo Sostenibel ta anuncia e prijsnan nobo di benta di combustibel entrante 13 september 2023 ta como lo siguiente.
Gasoline unleaded-premium lo subi cu 14,9 cen, pa wordo bendi awor na 283,7 cen pa liter.
Diesel Low Sulphur lo subi cu 26,1 cen, pa wordo bendi awor na 251,7 cen pa liter.
Kerosin lo subi cu 29.1 cen, pa wordo bendi awor na 234,4 cen pa liter. E prijsnan ta inclui BBO/BAZV/BAVP.
Desde siman pasa caba, analistanan internacional ta adverti cu prijs di combustibel ta bay conoce subida basta fuerte. Esaki ta inclui na Merca, unda nan ta calcula cu prijs di gasoline den algun region lo por subi cu $1 extra pa gallon.
Parti di e aumento di prijs, ta e anuncio di Arabia Saudita cu nan ta extende nan corte di produccion di crudo. Esaki automaticamente ta pone cu prijs ta bay subi. Algun region di Merca ya caba ta raportando cu prijsnan di gasolin ta kibrando record y of yega igual cu nivelnan di 10 aña pasa.
Loke ta afectando e prijs tambe te ainda ta e guera andando na Ucrania, como tambe condicion di maltempo cu ta un estorbo pa cu transporte di combustible y operacion di refineria.
Pero e principal culpa ta wordo tira riba e cortamento di produccion cu Arabia Saudita ta haciendo, y tambe interupcion di suministro di crudo na pais Libya.
Manera DIARIO a anuncia siman pasa caba, prijs pa bari di crudo ta sigui subi tambe, y ta parce cu e ta buscando forma pa yega bek na e nivel di $100 pa bari. Te cu Diamars atardi, prijs pa bari di Brent Crude Oil ta na $92,20 pa bari, y prijs pa bari di WTI Crude Oil ta na $89.10 pa bari.
