ORANJESTAD (AAN): Lider di MEP, Evelyn Wever-Croes, den nomber di Partido MEP, ta felicita Parlamentario Edgard Vrolijk kende a worde re-eligi como Presidente di Parlamento pa e aña Parlamentario 2023-2024, drentando asina su di tres aña den e funcion aki.
“Nos a conoce Edgard Vrolijk como candidato riba lista di MEP y despues a bira Parlamentario di Fraccion di MEP y awe, como Lider di MEP, cu un sentimento di hopi honor y orguyo, mi ta comparti cu Partido MEP, sostenedornan di nos partido y Aruba en general, cu Señor Vrolijk a worde eligi un biaha mas pa e posicion importante aki”, Lider di MEP a expresa.
Edgard Vrolijk ta un persona cu ta dedica hopi tempo na su famia, na su bario, na su deporte, y como Presidente di Parlamento. Di Meneer Edgard manera tur hende conoce, a drenta Parlamento y pone ordo y disciplina y ta treciendo Parlamento na e nivel cu e pueblo di Aruba ta desea pa mira e Parlamento aki.
Un persona cu por dialoga cu tur banda, tanto esnan na fabor di Gobierno como esnan den oposicion. Pero tambe e ta un persona cu sa unda e tin cu caba cu un descusion pa pone ordo unda cu tin mester.
“Partido MEP ta contento di mira cu Señor Vrolijk a keda reeligi como Presidente di Parlamento y nos tin tur confianza cu e lo haci un tremendo trabao e aña Parlamentario aki tambe. Un aña, hopi particular pasobra e ta e aña na unda cu nos ta bay traha mas riba independisacion di Parlamento”, Lider di MEP a enfatisa.
Lider di MEP a indica cu independisacion, e organo di Parlamento lo depende menos di Gobierno pa loke ta trata personal cu ta traha eynan y e presupuesto di Parlamento mes, entre otro. Esaki ta un trabao grandi cu Presidente di Parlamento ta trahando riba dje y cu sigur lo mira hopi cambio manera cu esaki keda cla. Tambe Señor Vrolijk ta trahando riba e tema di Ombudsman. Ya e vacatura a worde publica pa busca un Ombudsman pa Aruba. Riba esaki tambe el a pone hopi tempo y energia den dje.
“Edgard, pabien, den nomber di Partido Movimiento Electoral di Pueblo, henter e famia di MEP. Nos ta desea bo hopi sabiduria y exito den e aña nos dilanti”, Lider di MEP a expresa
