Richella Dorothal di DTI:
ORANJESTAD (AAN) – Segun articulo 9 di e Landsverordening Wegverkeer, tur vehiculo cu ta circula riba caminda publico mester cumpli cu e exigencianan stipula den e Landsbesluit Voorschriften Voertuigen. Señora Richella Dorothal di Dienst Technische Inspecties (DTI) a splica cu e servicio ta encarga cu e proceso di keuring pa determina si un vehiculo ta apto pa uzo riba nos careteranan.
Prome cu un vehiculo por wordo registra y circula legalmente, e mester pasa un inspeccion tecnico. E Landsbesluit Voorschriften Voertuigen ta distingui entre dos categoria principal: motorvoertuig y motorfiets. Dorothal a splica cu un motorfiets, un brommer, ta un vehiculo cu ta pisa menos di 600 kilogram y no tin un carrosserie cera. Un motorvoertuig, di otro banda, ta un vehiculo cu ta pisa mas di 600 kilogram y cu tin un carrosserie.
Dorothal a indica cu, cada biaha cu un tipo nobo di vehiculo drenta, DTI ta aplica e criterianan stableci den ley pa determina den cual categoria e ta cay. A base di e evaluacion aki, e servicio ta verifica si e vehiculo ta cumpli cu tur rekisito pa por circula legalmente riba nos careteranan. Si e vehiculo no ta conforme cu e exigencianan legal, e no por wordo aproba pa uzo riba caminda publico.
“Esaki ta e mesun procedimento cu DTI ta sigui durante e proceso di keuring di vehiculonan nobo. Dependiendo di e tipo di plachi di number di e vehiculo, nos ta verifica si esaki ta coresponde cu su categoria. Si nos constata cu e plachi no ta cuadra cu e peso of clasificacion di e vehiculo, nos ta informa Departamento di Impuesto (DIMP) pa por tuma e medidanan corespondiente”, Dorothal a declara.
Cu e sistema di inspeccion y clasificacion aki, DTI ta garantisa cu solamente vehiculonan cu ta cumpli cu tur e normanan tecnico y legal por forma parti di trafico na Aruba. Segun e servicio, esaki no solamente ta contribui na un miho cumplimento di ley, sino tambe na mas siguridad pa tur usuario di nos careteranan.
