ORANJESTAD (AAN): Tabata Dialuna mainta trempan, cu Centro Operacional Maritimo (MOC) di Wardacosta di Caribe Hulandes a ricibi yamada di urgencia for di un barco di carga cu e momento ey tabata nabegando den cercania di Islanan ABC.
E yamada di urgencia a indica cu abordo un miembro di tripulacion a bira basta malo, y urgentemente e mester haya asistencia medico.
Personal di Centro MOC a double check y a nota cu e isla mas cercano ta Corsou. Mesun momento a check cu e Docter di Organizacion CITRO pa bisa loke ta pasando riba e barco di carga. Demas tripulantenan a bin haya e persona abao na suela sin cu ta reacciona, y mesora nan a cuminza duna yudansa, y core haci yamada di urgencia.
E docter di CITRO a analisa tur e detayenan aki, y el a mustra cu e ta un caso serio, y ta pidi pa mesora bay busca e tripulante aki pa por trece urgente pa e Hospital di mas cerca.
Asina a laga e Helicopter di Wardacosta lanta vuelo y a bula rumbo pa e barco di carga pa busca e pashent. Na un forma bon coordina nan a logra di hisa e pashent abordo, y asina regresa e ruta bek pa Corsou. E Helicopter a ateriza na Aeropuerto CUR di Curaçao, y aki ya caba tabatin un Ambulance cla pa tuma e pashent, y bay cu ne urgente pa Curaçao Medical Center (CMC) pa mas trato medico.
Mas detaye di e pashent no a wordo duna, debi na secreto medico.
