Tesorero y Vocero Edwin Roos:
*Ultimo dos siman el a haya falta di esaki
ORANJESTAD (AAN) – Stichting Onroerend Goed Aruba (SOGA), a yama un conferencia di prensa, Diabierna cu a pasa, den cual a hiba palabra señor Edwin Roos, Tesorero y vocero di SOGA.
Roos a cuminza cu un remarke personal, indicando cu e ta un tiki desapunta. El a expresa cu tin dos siman cu e asunto di e edificio di Hospital (Dr. Horacio Oduber) ta andando, pero e no a wordo acerca pa ningun medio di prensa.
Den un medio el a lesa cu SOGA, pa orguyo, no a mustra interes pa yega na un solucion.
“Boso ta kere cu un team di profesional lo a haci algo pa orguyo, riesga su reputacion, y perhudicando no solamente SOGA, pero e proyecto cu ta uno esencial pa Aruba?” Roos a expresa.
El a subraya cu SOGA tin orguyo si, orguyo den e trabao cu nan ta haci. “Nos ta haci nos trabao, diariamente, sirbiendo e comunidad di Aruba. Y kere mi, e no ta facil ora bo lanta mainta y bo ta tende of lesa den media, cierto cosnan cu bo sa cu no ta cuadra cu berdad, y nos ta habri pa boso acerca nos y puntra nos”, el a señala.
Roos a sigui bisa cu SOGA su relacion cu gobierno, Hospital y e Contratista ta bon. Circumstancianan a pone cu nos a yega na e situacion actual, cu nos mester a dicidi di parti caminda prome cu bay asina leu, cu nos no por pasa den e mesun porta hunto mas.
Pero despues di tanto aña cu e Contratista OHLA ta aki na Aruba, nan tambe kier wak e proyecto aki finaliza. “Nan no ta bay tey te final mas, pero nan ta disponible pa nos ketobay, te fin di e proyecto, pa asistencia si mester, y pa consulta”, Edwin Roos a menciona.
Roos a conclui, e prome parti di su informacion, cu e siguiente palabranan dirigi na prensa: “Mi kier djis corda boso, e tremendo impacto cu boso tin riba nos comunidad. Ami lo puntra boso mas ainda, pa haci esfuerzo pa trece e noticia corecto, obhetivo y balansa. Cu esey mi kier bisa di biaha cu nos porta tambe ta habri pa boso. Sigui cu boso trabao, e ta hopi importante y necesario, pero e mester ta balansa si, esey mi a sinti un tiki falta e dos simannan aki”.
