Un hala nobo den AVP ta confirma autenticidad di lucha di DIARIO
*Festival di Musica a bira lucha libre den campo politico di Aruba
*Ley di Contabilidad a bira sagrado mientras hospital ta moribundo
ORANJESTAD(AAN)—“Con a gasta e placa di e Pueblo di Aruba? Kico a haci cu e Ley cu mester a garantisa cu e placa di Pueblo ta wordo bon uza pa asina a evita cu ora pandemia y crisis mundial a bati na porta, Pueblo di Aruba por a defende su bida sin necesidad di mas prestamo?”
Kico a haci cu e placa di Aruba?
Esaki tabata e preocupacion mas grandi di DIARIO cu den investigacion tras di investigacion a tene su mes ocupa cu desaroyonan cu a causa e problemanan mas serio na Aruba, cu awe mester paga pa medidanan pa un dia e por para financieramente riba su pia atrobe.
E lucha di DIARIO pa bienestar di e Arubiano y di Aruba, tabata hancra den e forma cu a abusa di e placa di Aruba for di 2009, ora mundo a conoce un situacion di recesion.
DIARIO a pidi autoridad penal di Aruba bay tras di e rapport di 1.6 Biyon cu a kibra tur regla y ley den e forma cu gobernantenan politico tin autoridad pa atende cu placa di Aruba.
Husticia ta haci su mes y awe husticia ta wordo haci cu e Pueblo di Aruba, na momento cu hasta bida di e Arubiano ta wordo cuestiona a base di e forma abusivo cu Gobierno di Mike Eman a atende cu placa di Aruba cu permiso di mayoria di Parlamento di Aruba, cu a deshaci di e Ley di Contabilidad, cu ta mara uso di placa di Pueblo na cadena di ley.
Awe pago pa un festival musical, porfin ta uni Aruba den e lucha mas sagrado cu por a wordo hiba na Aruba for di 2009, ora bienestar di Aruba a wordo destrui na momento cu Gobierno Mike Eman a trapa riba Ley di Contabilidad y a baha e entrada di Aruba cu un promesa politico, cu a habri porta pa su persona por a bira Prome Ministro di Aruba.
Ley di Contabilidad, cu ta sigura e bienestar di e Pueblo di Aruba, a bira wega politico barata den Parlamento di Aruba na momento cu e mayoria di AVP den Parlamento, a bay di acuerdo pa Mike Eman hunto cu Benny Sevinger por a gasta un suma 1.6 Biyon sin control di Parlamento di Aruba, loke a haci cu awe Aruba mester paga y sigui paga belasting y debenan halto cu e pais mester a haci pa asina evita un desastre social y financiero na Aruba.
Na momento cu a bay busca Citgo pa trata na sconde e desastre financiero total den cual a hinca Aruba, a sigui kibra ley y a entrega Aruba na Nicolas Maduro, awe gran sostenedor di Rusia den e confrontacion mundial den un acuerdo cu no a wordo trata den Parlamento, manera Ley ta exigi.
Awe DIARIO, cu semper a lanta para pa e menosprecio total di Ley di Contabilidad cu tabata realidad ora Aruba tabata den man di AVP, mester aplaudi cu e miembronan di fraccion di AVP ta uni na e lucha pa respet pa e Ley di Contabilidad na cual nan ta tene awe.
2023 a habri cu algo mucha mas grandi cu DIARIO mes por a pensa. Porfin Ley di Contabilidad cu ta dicidi con mester atende cu placa di Pueblo, a haya e lugar cu e merece den Parlamento di Aruba.
Porfin kier investigacion legal pa e forma cu ta atende cu placa di Pueblo, manera semper DIARIO a aboga.
Nos ta yama bon bini na e miembronan di Parlamento di AVP den e fila di nos lucha pa respet pa Ley di Contabilidad, e defensa grandi di Florin di Aruba, cu ta wordo kibra y mata ora no tin respet pa e forma cu ta atende cu placa di Pueblo.
DIARIO ta un fiel creyente di e realidad cu Husticia ta haci su mes. Husticia ta e palabra cu ta sostene e grito pa Ley di Contabilidad por respeta pa asina placa di Pueblo no wordo abusa den proyecto ni di diez ni di cinco strea , cu a zink hasta e seguridad cu tin un hospital caminda e bida di e Arubiano tin defensa di ciencia.
