Den un mundo di conkista y menasa creciente di guera
*Pakico awor mester atende pago di un festival difunto?
*Awe un Aruba uni mester discuti e futuro menasa di Aruba
ORANJESTAD(AAN)—Durante e fin di siman cu a pasa, Aruba a celebra e Dia di Himno y Bandera.
Mientras Aruba tabata recorda y celebra e responsabilidad grandi cu e logro di Status Aparte a entrega na e pais, trabou a sigui pa sigur periodistanan cu mester duna contenido na nan profesion y percura pa Aruba no wordo sorprendi pa desaroyonan sumamente peligroso pa felicidad y bienestar humano.
Un mundo di conkista y menasa creciente di guera, ta e panorama internacional den cual Aruba mester crea un futuro nobo, y cu continuamente ta bira mas serio.
Expertonan internacional ta lansa e pregunta si mundo ta para na e mes punto cu 1941, cu ta nifica entrada na Segunda Guera Mundial loke sigur merece tur atencion.
E Organisacion Transatlantico di Nacionnan, NATO, di cual Hulanda ta parti, ta prepara pa manda 300 Mil soldat mas pa e frontera cu Rusia.
Merca mester contesta e menasanan continuo di aliansanan nobo cu ta surgi contra paisnan liber y den cual Merca ta central.
Rond mundo e cantidad di migrantenan ta aumenta cu peliger pa tur nacion. Si hasta un pais manera Merca, cu a forma su mes a base di migracion, tin problema cu e situacion actual di migrantenan, Aruba sigur mester ocupa su mes tambe cu tur loke esaki lo encera sigur si ta bay habri frontera atrobe cu Venezuela, cu ta centro di comunismo pero tambe di situacionnan inaceptabel pa democracia y orden di ley.
Seriedad di mundo politico mester wordo cuestiona na momento cu un festival difunto awe ta bira tema politico a base di e placa cu mester paga na e compania concerni.
Ta increibel, cu mientras un futuro sumamente insigur ta exigi tur nos atencion, hasta pelea interno den e partido den oposicion ta rementa.
Nos ta di acuerdo cu e miembronan di Parlamento cu a presenta nan mes como “hala nobo” cu mester bini claridad den loke no tin claridad actualmente.
Pero nos pregunta ta keda, pakico e asunto aki ta rementa awor y no a wordo atende for di momento adecuado den pasado.
Aruba mester atende cu asuntonan sumamente importante, manera nos a trece dilanti. E situacion na Hulanda ta indica cambio cu por presenta y por afecta e sistema cu actualmente Aruba ta atende cu Hulanda.
Na entrada di un siman nobo, e sentido di responsabilidad pa e pais mester prevalece.
E fin di siman tras di lomba, Aruba a celebra su Himno y Bandera, cu mester ta inspiracion pa hiba Aruba dilanti como pais cu tin su basenan den ley.
Awe cu scandal ta rementa rond di un Festival di Musica, e pregunta grandi ta keda con ta respeta ley y con ta duna contenido na nos base legal cu a duna tur miembro di Parlamento hopi tempo pasa, e oportunidad pa regla y percura pa e asunto a wordo termina manera ley ta exigi pa asina awe Aruba lo por tabata tin oportunidad pa traha riba su porvenir den un mundo di crisis!
