ORANJESTAD (AAN): Recientemente Sociedad di Bijbel den Caribe Hulandes a haci presentacion oficial di loke nan ta yama, e prome Bijbel den ortografia oficial di Papiamento di Aruba.
Un deseo cu tabata biba di hopi tempo cerca creyentenan na Aruba a keda realisa y awo tur hende tin acceso na e Palabra di Dios den nos dushi Papiamento di Aruba. E anochi a bay acompaña cu musica special, cantamento, y por a mira e conocido Afra Henriquez cu a trece un danza cu e Bijbelnan aki nobo poni den macuto.
Pa e ocasion bunita aki tabata presente e.o Ministro President Evelyn Wever-Croes, kende a ricibi e prome copia di e Bijbel nobo aki na Papiamento. Tambe tabata presente Minister Xiomara Maduro di Cultura a comparti cu esnan presente dos anecdota di su trabao como mandatario.
E prome ta di tempo di pandemia, y Minister Maduro a expresa den e siguiente forma. "Como Minister encarga cu finansa y economia, dos tereno cu a sufri daño grandi, tabata tin hopi presion y bida di hende tabata na peliger. Den un di e reunionnan e presion a bira di mas, mi a flihi y a punto di bisa te aki mi ta yega. Bahando cabes, riba e pagina di mi notebook, mi por a lesa e frase di Salmo 46:10 cu ta bisa, 'Be still, and know that I am God.' Un frase cu ta recorda nos pa para keto y realisa cu Dios semper t'ey, e ta guia nos y ta percura pa obra a traves di nos pa asina nos por cumpli cu e trabou. Dios no ta duna nos un carga cu nos no por carga. Ta e Salmo 46:10 aki ta locual a yena mi cu sabiduria, forza y pasenshi pa logra haci un trabou grandi na bienestar di Aruba."
E di dos anecdota cu e mandatario a comparti ta esun di un bishita di Domi. Minister Maduro a expresa, "Mi a haya bishita recien di Domi cu a keda straña cu den nos 'wachtkamer' tin un Bijbel riba mesa. Domi a bisa, "waw mi a spera di topa hopi buki, pero mi no a spera di por a topa cu un Bijbel. Ma splica Domi cu como hende nos no por haci e trabou aki sin Dios y ta den eyden su palabra ta. Tur hende por ta trankil y tin e sabiduria cu esnan cu a tuma responsabilidad y ta haya confiansa pa guia, como hende tambe ta busca e Palabra di Dios."
Na final di su discurso Minister Maduro a gradici Sociedad di Bijbel y tur e traductornan cu a haci e bunita proyecto aki posibel na bienestar di e Pueblo di Aruba. "Un bunita proyecto cu ta keda presenta den e mesun siman cu nos ta celebra Dia Internacional di Lenga Materno, nos ta haya nos Bijbel na ortografia di Papiamento di Aruba," Minister Maduro a expresa.
