Sociedad Civil di Venezolanonan manifesta dilanti Consulado Venezuela

‘Nos a bin cobra loke nan a horta nos’

• Na Aruba solamente 40% por a vota
• Nan ta dispuesto pa sigui protesta y lucha

ORANJESTAD (AAN) Diaranzon atardi, dilanti di e Consulado di Venezuela, a tuma lugar un manifestacion di e sociedad civil di Venezolanonan residencia na Aruba.

Nan kier a mustra nan frustracion pa e resultadonan cu gobierno di Venezuela a publica pa mundo henter, unda a constata cu e oficialismo a haci fraude.

Segun señor Vicente, na cabes di e grupo civil a bisa cu nan a bay cobra loke a worde horta di nan, y cu nan a worde burla door di e Conseho Electoral Venezolano.

El a vocifera cu e Venezolanonan mester di ayudo internacional, cu Venezuela bolbe tin e democracia cu tabata tin den pasado, nan mester di e ayudo di e Organismonan Internacional. El a bisa cu nan lider Maria Corina Machado a duna e Organizacion di Estadonan Americano (OEA), e datonan corecto cu ta mustra cu oposicion a gana 70 riba 30, cu ta un porcentahe bastante halto. Mescos cu na Aruba, unda e diferencia tabata circunstancial, tambe a refleha na Venezuela y henter mundo. “Nos mester libertad pa Venezuela” señor Vicente a reitera.

Mientras tanto su acompañantenan den 'background'  tabata vocifera “libertad! Libertad!

Vicente a remarca cu nan tin cu sigui protesta y lucha pasobra nan no por perde e libertad di nan pais, no ta nada si tur dia nan tin cu sali yega dilanti e Consulado pa protesta.

“Nos mester pa e narcodictadura aki sali for di nos pais!” el a señala.

El a comenta cu Gobierno di Costa Rica a ofrece Maria Corina asilo politico, pero e no a acepta. E kier sigui enfrenta e lucha, pasobra e ta un muher di hero! Asina señor Vicente a subraya.

El a agrega cu nan tin un sentimento grandi di tristeza pasobra solamente 40% di e Venezolanonan biba na Aruba, a haci uso di nan derecho di voto.

“Nos a vota akinan 488 persona Venezolano pro oposicion y 88 pro e narco gobierno”, ta palabranan expresa pa señor Vicente.

E meta di e manifestacion aki ta comun na tur Venezolano cu ta biba na tur otro pais di mundo, di sali protesta pa sostene nan conciudadanonan cu ta na Venezuela.

Di parti di señora Hernandez, el a bisa cu e amenaza contra Maria Corina Machado tabata algo spera, logicamente, mirando for di unda ta bin, pero e ta conta cu e proteccion di e pueblo Venezolano y e Instancianan Internacional cu tur ta na su fabor y di Edmundo Gonzalez. Hernandez a subraya cu loke e Venezolanonan kier ta pa ratifica señor Edmundo González como Presidente electo di Venezuela.