Minister Arends a anuncia reglamento nobo:
ORANJESTAD (AAN): Den un frega di wowo, e pleito eterno di decada di 1990 y tambe 2000 a desaparece! Tempo aya e mayoria di Taxistanan a dicidi cu ta pone maximo di 5 pasahero pa cada Taxi. Esaki ta pa yuda ‘parti e bolo” na forma mas husto.
Si un grupo di turista yega cu 7 persona, antes nan ta wordo obliga di tuma 2 Taxi. Cu esaki ta 2 taxi tata di famia ta haya entrada.
Esaki a yega su fin awor na 2024, ora cu inespera Ministerio di Transporte, Integridad, Naturalesa, y Adulto Mayor a haci anuncio un decreto ministerial nobo riba e cantidad maximo di asiento pa taxistanan.
E decision aki ta atende cu e necesidad creciente di taxi cu tin capacidad mas grandi. Particularmente pa grupo familiar y turista cu kier biaha hunto. Un decision cu a worde tuma cu participacion di representantenan di e industria.
Puntonan Importante: Nan ta trece varios punto importante den e asunto aki.
Aumento di Cantidad di Asiento: (*) E capacidad permisibel di asiento den vehiculo di taxi a aumenta di 5 pa 7 asiento, sin conta e stul di chauffeur. E cambio aki ta drenta na vigor inmediatamente despues di firma di e decreto ministerial.
Periodo di Transicion: Operadornan di taxi cu vehiculo cu actualmente tin mas cu 7 asiento (sin conta e stul di chauffeur) mester adapta nan vehiculo pa e regulacion nobo pa un maximo di 7 asiento pa dia 30 di September 2024.
Reglamento y Sancion: Departamento di Transporte Publico lo controla e cumplimento cu e regulacion nobo di asiento. E medida di control lo cuminsa dia 1 di october 2024, cu siguiente sancionnan:
Prome violacion: Suspension temporario di e licencia di taxi pa 30 dia. Di dos violacion: Suspension temporario di e licencia di taxi pa 90 dia. Di tres violacion: Revocacion permanente di e vergunning di taxi.
Consideracion pa Pasahero Durante Control: Durante control di cumplimento, si descubri cu e vehiculo di taxi tin mas cu 7 asiento pa pasahero y tin pasaheronan den vehiculo, e chauffeur lo haya e oportunidad pa cumpli cu e pasahero prome.
E decision aki ta refleha e compromiso di Ministerio di Transporte pa adapta na e necesidadnan di e comunidad y pa mehora e eficiencia di e servicio di transporte publico. E regulacionnan nobo ta un paso fundamental pa alinea e praticanan di e industria cu e espectativanan di e sector, y asina mehora e infrastructura di transporte publico den su totalidad.
Ministerio di Transporte lo sigui monitor e efectividad di e cambionan pa garantisa e servicio di transporte. E maneho nobo por worde encontra riba riba Publico.aw.
