ORANJESTAD (AAN) – Directora di Departamento di Asunto Social, Glenda Hernandez, a elabora den conferencia di prensa, pa update informacion tocante Social
Crisis Plan, tocante e metanan cu a wordo logra caba.
“E logronan di Social Crisis Plan, te aworaki, ta diferente. Esnan mas destaca ta structura cu nan a crea. Apart di e leynan cu Minister Andin Bikker a papia di nan, nos a traha di nos mes hunto cu Departamento Huridico, e Codigo di Proteccion pa proteha e mucha y zorg pa e calidad di servicionan den cuater sector, y nos a bin cla cune na Maart”, Hernandez a splica.
E cuater sectornan aki ta Husticia, Enseñanza, Social y Salubridad Publico.
El comenta cu esaki a tarda un poco mas di loke a premira pasobra nan a entrena como 500 profesional den con pa traha un plan di seguridad, y esey a tuma su tempo, y esencial ta pa e ley wordo ehecuta.
Otro ley cu nan tuma parti den dje ta esun di crèche y aworaki tin hende ta wordo entrena. El reitera cual ta e cuater sectornan unda nan a entrena entre 500 pa 600 profesional. “Un training pisa, cu tin como meta pa traha un plan di seguridad ora bo ta mira algo, anto bo ta zorg pa e problema wordo atendi”, Hernandez a bisa.
Director di DAS a sigui splica cu tanten cu tur e acontecimentonan aki ta andando, a bin ripara cu mester di un Departamento pa Mucha y Hoben, cu internacionalmente ta wordo puntra pe. “E ta wordo puntra unda e departamento aki cu ta encarga, specificamente, cu derechonan di mucha ta. Y pesey nos a bin cu e iniciativa pa lanta e departamento cu lo wordo encarga cu ehecucion di e leynan, evalua, bay den veld wak si nan ta cumpli cu ley, y si nan no ta cumpli ley lo bin strafe”, Glenda Hernandez a señala.
El a menciona tambe un plan cu ta bay wordo desaroya dirigi na mayornan cu ta bay divorcia. DAS ta bay encarga cu esaki. Esakinan ta hermentnan pa traha ley y e profesionalnan ta wordo entrena pa ehecuta y cumpli cu e ley, y ta pone hende controla si e leynan ta wordo aplica, pasobra ta trata di bida di mucha y di hoben.
“Pesey, ta sumamente crucial como gobierno pa duna aporte na e sorto di leynan cu ta proteha nos muchanan”, Hernandez a remarca.
E VISION PEDAGOGICO:
Glenda Hernandez a bisa cu nan a bin cu programa di norma y balornan, cu hopi biaha a wordo pasa den television, y e ta kere cu hopi hende por corda di e seis stapnan manera haci bon cu bo partner y bay bon cune si no ta hunto mas, lanta e mucha den un ambiente amoroso, etc. Nan ta bay keda ripiti tur e stapnan, pa crea balornan sano pa lanta un mucha den dje.
E Centro pa Hoben y Famia a wordo aproba, e fondonan ta aloca, y aworaki nan ta buscando personal y trahando cu JZP, pa haci esaki realizable e aña aki.
