Frans Ponson, Presidente di CUA:
ORANJESTAD (AAN) Presidente di CUA (Comerciantenan Uni Aruba), a sigui elabora den entrevista cu Matutino DIARIO, tocante e tema di aumento di prijs riba productonan di consumo basico, unda cu e comerciantenan, segun e organizacion, ta wordo tilda cu nan ta subi prijs, cu loke nan no ta di acuerdo y ta sinti cu ta gobierno ta instiga pueblo.
Ponson a trece dilanti cu tin ochenta comerciante cu ta manda mensahe pa CUA pero nan mes no kier bin dilanti cu e tema, p’esey CUA ta hacie.
“No ta Frans cu Francis, sino comerciantenan cu no ta gusta wordo tilda asina aki cada rato. Awe, sikiera nos a trece e situacion dilanti di comercio en general. Corda bon, tur e surplus y pago cu gobierno a bin cu’ne ta di gobierno e ta”, Ponson a bisa y a reitera pa e politiconan pa nan gana nan voto na un manera responsabel.
El a bisa cu entre tur e gremio comercial mes nan ta reuni y discuti riba temanan cu nan tin andando, pero no riba e asunto di prijs. “Pero e topico aki ta uno cu gewoon a frustra nos. Bo ta wak cu Banco Central ta haci un encuesta aworaki, pero claro si esey bo ta tende henter dia di bo politiconan, si bo puntra mi riba caya, ami no ta wak e prijsnan di seis luna pasa pa mi haci un lista. Bin cu documento no djis papia. E cosnan aki ta trece problema entre pueblo cu comercio cu no mester”, Frans Ponson a remarca.
Hecho ta si, cu e consumidor ta confronta dia aden dia afo cu subida constante di prijs. Awe un producto tin ‘x’ prijs mañan a aumenta, y esey ta algo real.
Ponson a señala al respecto cu “handhaving” ta un cos cu CUA ta grita vooral pa comerciante, cu ley pa un ley pa tur. “Un ta paga belasting, tur ta bay paga. Tur hende sa, cu mayoria di lugar no tin recibonan y cahanan no ta dun’e. Nos tur sa esey. No tin hand having y gobierno no kier bin cu ne”, segun Frans Ponson, presidente di CUA.
Ponson ta señala tambe cu controla prijs ta e asunto di mas transparente cu tin aworaki. Tur hende cu tin un telefon den su man por controla esey. “Si subi internet aworaki nos ta wak prijs, e ta mas transparente cu nunca”, el a reitera.
El a bisa cu si un hende kier cumpra producto di afo, bestel bin bend’e na Aruba y splica comercio di con na Aruba ta caro. “Bay cumpre, bay paga na Aduana e costo, e container di 8 mil dollar, bin cu ne, bay paga e coriente, haci’e y siña e comerciantenan con pa haci’e. “E ta parce ta facil riba facebook. E no ta facil pero si ta transparente pasobra ningun hende por bisa cu e no por wak e prijs. Si bo por hacie mas barata bin hacie”, Ponson a subraya.
