Andres Hernandez, miembro di directiva: - ORANJESTAD (AAN) – E siman aki Formador Evelyn Wever-Croes, ta sigui cu e di tres ciclo di reunionnan cu e stakeholders, den cuadro di formacion di gobierno nobo.
El a reuni, entre otro, cu San Nicolas Business Association y den conferencia di prensa Andres Hernandez, miembro di Directiva di SNBA a relata cu impresion tocante e reunion cu Formador.
Hernandez a bisa cu pa SNBA e reunionnan aki ta hopi importante, unda gobierno ta bezig cu personanan cu ta conforma e pueblo en general di Aruba. Vooral pa SNBA y esnan pariba di brug y e Distrito di San Nicolas nan ta pensa cu ta hopi positivo. SNBA, durante e reunion aki, a entrega un manifesto den cual a pone tur e puntonan cu nan ta follow up, di cosnan realistico cu mester sosode pariba di brug. En general, e ta pensa cu e reunionnan aki ta hopi positivo di tur forma.
Hernandez a splica cu den e manifiesto tin 18 punto cu ta hopi pa menciona den e rueda di prensa aki, y no ta trata di solamente business. “Ban corda cu pariba di brug nos a hereda no solamente business, pero e parti social. E puntonan ta valido y no tin nada nobo pero si enfatizando riba e proyectonan cu ya caba nan ta trahando hunto cu e gobernacion cu a pasa y cual lo ta tremendo si por sigui cu e gobernacion nobo”, Hernandez a expresa.
E puntonan aki lo accesible riba e website nobo di SNBA for di dialuna di e siman aki atardi, unda tur hende por subi y ta facil pa ubik'e.
El a bisa cu tin hopi aspecto cu San Nicolas mester ainda, pero despues di hopi aña, e distrito ta hayando un luz chikito den e tunel, cu ta habriendo cada bez.
Hernandez a señala cu e relacion entre loke el a yama e plataforma di tur e gruponan organiza di pariba (cu ta conforma practicamente 30 pa 40% di e poblacion di Aruba en general) y gobierno.
Durante e reunion cu Formador, SNBA a sinti cu esaki lo bay continua y cu e ta bay ta hopi positivo pa e desaroyo futuro cu nan ta wardando pa pariba di brug. El a reitera cu esaki no ta solamente comercio pero den e manifiesto e asociacion ta papia di educacion, proteccion di beach y tur loke ta riba santo blanco. Y tambe comercio cu SNBA su “core business”.
Den e manifiesto tambe tin temanan cu ta encera den un block manera e refineria, ferry, palo marga, cu ta wardando pa atencion pa hopi tempo caba.
Hernandez a bisa cu SNBA kier wak den e prome cien dianan un decision tocante e refineria, si tin e hendenan adecua, y si no pa wak kico lo haci.
“En principio e borg, no solamente ami, nos a kere mas den no pone tur e webonan den e mesun nest. Nos ta kere mas den REOI-2. Pero ban ta claro y honesto. E ta mas grandi cu nos si e refineria kier bin habri bek eynan. E ta algo cu nos tin caba y cu por wordo haci. Mi kier corda pueblo, mediante e rueda di prensa aki, cu mi tin entendi cu ora Lago a tuma e refineria over, e tabata den peor estado cu e ta aworaki” Hernandez a comenta.
