ORANJESTAD (AAN): E ultimo dianan a tuma nota cu diripiente ladronicia den v-cars a cuminsa lanta cabes. E tendencia ta specialmente den areanan aleha, na costa di nos isla.
Antisocialnan ta kibra glas di auto y horta pertenencianan di turistanan.
Minister di Husticia mr. Andin Bikker a pidi Cuerpo Policial Aruba pa duna atencion adicional riba e tereno aki pa optimalisa siguridad den e areanan afecta pa e ola di ladronicia.
Mas cu djis control, minister Andin Bikker a referi na un plan cla net prome cu Covid-19, cu a bay “on hold” door di e pandemia, den cual ta aspira pa laga instala wireless solar battery powered camara's na diferente hotspots. Manera el a anuncia durante tratamento di Presupuesto, lo reactiva e plan aki.
Tambe ta den contacto estrecho cu Aruba Tourism Authority (ATA) pa duna atencion adicional na e turistanan afecta.
Gobierno, KPA y Ministerio Publico a haci hopi esfuerso pa por reduci e nivel di criminalidad prome y durante e pandemia. Ta lamenta cu net awo cu economia ta lantando back y turismo ta recuperando miho cu a anticipa, un of mas antisocial ta comete crimen cu ta afecta turistanan y asina basicamente ta perhudica nos economia. Lo haci uzo di tur recurso posibel pa yega na e antisocialnan aki y percura pa persigui nan pa e delitonan aki.
Si tin un motibo di con Aruba ta den e top di islanan preferi pa turismo ta pa nos nivel halto di siguridad. Pues lo no keda man crusa ora cu un of mas individuo, sin amor patrio, ta comete tipo di actonan asina cu por haci un daño na nos turismo.
Na final e mandatario a corda tur hende cu seguridad di nos isla ta un esfuerso mutuo. Pues tur cu por sa algo, of a tende algo of a mira algo, yama polis mesora. Ta hunto so nos ta logra gara e antisocialnan aki y salbaguardia seguridad y bienestar general.
