A haya lus berde di BRA --- ORANJESTAD (AAN): Si bo tuma bon nota, varios pais den region no a cancela nan Carnaval,.
Nan a djis cambia e fecha. Algun ciudad na Colombia mes cu ta famoso pa nan Carnaval, a cambia e fecha pa luna di Maart, of mas despues.
Tin mas pais cu ta organizando Carnaval cu a cambia di fecha. Algun luna pasa, hasta e isla di Cayman Islands a tene nan parada di Carnaval, pero solamente hendenan vacuna so por a participa.
Awor tin indicacion cu Aruba tambe kizas ta bayendo e rumbo ey. Mirando e hecho cu e cantidad di casonan activo di Coronavirus a cay drasticamente, y cu tin mas hende riba e isla cu ta vacuna.
E organizacion di Carnaval, esta SMAC a caba di reuni cu Bureau Rampenbestrijding Aruba (BRA). DIARIO a haya sa cu e reunion aki tabata uno hopi positivo pa cu e celebracion di mas grandi di Cultura di Aruba.
BRA a duna lus berde na SMAC pa por cuminsa planea eventonan carnavalesco como tambe parada di Carnaval den July 2022.
SMAC lo acerca y pidi un reunion cu Minister di Finansa y Cultura sra. mr. Xiomara Maduro referente e noticia menciona.
SMAC ta desea di pidi tur grupo di carnaval existente y tur musiconan pa keda pendiente pa un reunion cu lo wordo yama pa sinta cu e gruponan di carnaval di Aruba y musiconan cu ta engrandece Aruba su Carnaval, pa asina wak cua ta e gruponan cu lo ta dispuesto pa participa.
Alabes lo evalua cual evento carnavalesco lo por tuma luga mirando e periodo cortico cu lo tin pa prepara e eventonan carnavalesco aki.
SMAC ta trahando duro pa por Celebra Aruba su Carnaval den Juli 2022.
