Desaroyonan fiscal den pasado tabata tin resultado serio pa e pais --- *Comercio ta e motor di economia cu ta productor di belasting --- *Gremionan tin deber di vigila gobernacion na un pais democratico
ORANJESTAD (AAN)- Manera a wordo anuncia dor di un grupo di organisacion di comerciante, nan lo bay profundisa nan mes den e forma cu introduccion di BTW pa reemplasa BBO, lo afecta Aruba.
Pa DIARIO tabata trata di un participacion importante di e gremio, cu ta e motor economico di un pais democratico caminda tur organisacion, tur grupo of persona cu ta representa miembronan di un comunidad, tin e deber di sigui gobernacion y confirma pa nan mes cu gobernacion ta tuma lugar segun regla.
Siglo 21 a duna prueba cu mester vigila kico reforma di Belasting por haci pa un pais.
Cambio den e sistema di belasting dor di Gobiernonan na mando, hasta por wordo considera como base directo di destruction di e e base financiero di Aruba manera semper DIARIO a mantene.
Pa bolbe na BBO, mester mira cu den e temporada aki, belasting indirecto a haci su entrada na e parti di Reino den Caribe cu a bira victima di desaroyonan financiero y economico mundial.
Introduccion di BBO tabata basa riba reforma di belasting, den cual a adapta diferente belasting.
E problema grandi di BBO semper tabata e sistema acumulativo cu tabata su base.
For di momento di introduccion di BBO, DIARIO tabata entre e grupo cu a bisa cu costo di bida lo aumenta considerablemente, aunke cierto peso di otro belasting a baha.
E forma cu a atende cu BBO den circulo politico a haci cu BBO a bira un instrumento politico y no un asunto cu na nivel gubernamental mester a wordo coregi manera instancianan oficial cu ta conseha Gobierno, tambe a duna di conoce den nan rapportnan.
BBO como instrumento politico a pone Gobierno Mike Eman na mando, pero tabata obvio cu su solucion pa deshaci di BBO, lo a causa e desastre cu el a causa.
Entrada di Aruba cay loke Gobierno Mike Eman mes a acepta ora a anuncia cu no por kita e BBO completo mientras cu despues pa atende cu AZV a dicidi pa aumenta BBO.
Aruba mester yega na un areglo nobo y Hulanda sigur a papia pa hopi tempo di e sistema BTW, cu ta e value added tax.
Comercio sigur tin un tarea, mescos cu tur otro gremio y tambe medionan di comunicacion, pa guia Aruba den e asunto aki despues cu e pais a bira victima di wega politico cu BBO na 2009.
Cu Aruba mester di un reforma di belasting ta un hecho. Un reforma den cual pueblo por tin confianza y pa esaki por wordo alcansa mester por conta cu bendicion di tur gremio cu ta parti activo di comunidad, semper y cuando nan preocupacion ta legitimo.
