Hues di LAR a ordena pa para trabaonan di construccion di Secrets Hotel

Proyecto su haltura ta violando leynan --- ORANJESTAD (AAN):  Manera DIARIO a informa diaranson, tin un caso den Corte di LAR cu e habitantenan di Sero Colorado a entama contra Gobierno.

   E caso aki ta relaciona cu 10 persona local bibando den e area cu ta contra cu e proyecto pa e desaroyo di Secrets Hotel na San Nicolas a haya permiso pa haci tal.  .  Na e  caso aki, tambe Fundacion Parke Arikok a uni alegando diferente aspecto pa loke ta medio ambiente y naturalesa, ya cu e desaroyo ta cay den e area cu nan ta cubri.

   A cubri e aspecto tecnico pa por haya un Bouwvergunning na Aruba, y tambe e regla di ROPV cu ta regarda e tereno unda e plan di construccion ta poni y ta inclui destinacion como ‘Area Turistico Costa Pariba”.  Segun articulo 23 prome inciso, y bao di punto A ta indica cu e area di Sero Colorado ta permiti lo siguiente: “Lugar di un Hotel cu maximo 600 camber pa segmento all-inclusive”.  Aki ta valido tabe pa construi un hotel den area di Sero Colorado, e siguiente condicionnan.  Construccion maximo di haltura y bouwlagen ta di 12 meter, pues 3 bouwlagen.  Tambe ta indica cu incidental e por ta 16 meter (4 bouwlagen), excepto si e plan di construccion ta posible bao di prome punto y si welstandscommissie a duna un conseho positivo.  Pero e haltura maximo di construccion por wordo pasa cu un plafon maximo di 2 meter.

   Na Augustus 2020 caba esnan cu ta vigilando e proyecto a pidi Ministro pa publica algun permiso di construccion cu a wordo duna na e proyecto aki.  Na October 2020 nan a logra di haya bista na oficina di DOW, di e detaye di e construccion di e Hotel, incluyendo e vergunning di construccion.   Na final di october un biaha mas e grupo di 10 a pidi Ministro pa por haya copia di e bouwvergunning.

   Sinembargo Ministro no a cumpli cu esaki.  Asina dos di e personanan di e grupo di 10 a dicidi na bay apela e asunto na Corte di LAR.   Pasobr anan dos ta pensa cu e mapa di e proyecto aki ta violando e haltura maximo cu ta wordo permiti, pasobra aki no a tene na cuenta cu e tera bao di e tereno ta un calichi cu ya caba ta 4 meter halto.

   Dilanti Huez, nan a trece calculonan haci a base di pintura di mapanan, unda ta saca conclusion cu ta violando e haltura di e edificio.  Esaki ta pone cu debi na su ubicacion na Sero Colorado, e lo bay ta afecta henter e bario pasobra tur hende lo bay perde bista, y tambe nan privacidad ta wordo reduci.  E mapa ta pone cu apenas par di meter leu di e casnan ya caba lo bay construi.  E bista pa lama lo bay wordo obstaculiza.

   Pues aki ta enfatiza riba aspecto di privacidad, luz, aire, y molester.  Nan ta insisti cu e plan aki ta viola e regla di ROPV cu ta mustra cu maximo 600 camber por tin eynan, siendo cu e mapa ta mustra cu ta trahando aki un hotel di 900 camber.

   Diaranson, Hues a ordena pa para mesora e trabao di construccion di e hotel aki na Sero Colorado, como cu e ta suspende e bouwvergunning cu a wordo duna den beschikking di 28 Mei 2020 number 0994-2019, te ora cu decision wordo tuma riba e bezwaar cu a wordo haci.

   Huez di LAR a bay di acuerdo cu e peticion di dos persona so den e grupo di 10.

  Tambe a duna ordo pa Ministro duna e dos hendenan aki un contesta dentro di tres luna.  Tambe Ministro tin di paga e gasto di abogado di e dos personanan aki.  

   Mientrastanto, e trabaonan di construccion di e hotel a worde para segun veredicto di hues.