Segun Pan American Health Organization:
*Continente Americano a registra mas di 190,3 miyon caso di COVID-19
*Ningun pais of organizacion tabata prepara pa e impacto di e pandemia
ORANJESTAD (AAN)/Washington DC: Den cuadro di e di tres aniversario di e aparicion di e pandemia di COVID-19, durante un conferencia di prensa diahuebs mainta, Director di Organisacion Panamericano di Salud - OPS (Pam American Health Organization - PAHO), Dr. Jarbas Barbosa, a haci un peticion pa e paisnan reforsa e vigilancia y pa sigui cu e vacunacion pa asina pone fin na e emergencia y prepara mihor pa futuro crisisnan sanitario.
Den e ultimo tres añanan, Continente Americano a registra mas di 190,3 miyon caso di COVID-19 y mas di 2,9 miyon morto, loke ta representa 25% y 43% di e total mundial, respectivamente.
"E pandemia a pone di manifiesto cu ningun pais of organizacion na mundo tabata plenamente prepara pa e impacto di e pandemia aki", Dr. Barbosa a declara. Esaki ta inclui e region di Americas, cu ta un region "marca pa e desigualdadnan".
Actualmente, e cifranan di incidencia ta entre 20 y 30 biaha menos compara c'un aña atras, pero
"aunke nos no ta totalmente fuera di peliger, nos ta den un lugar hopi mihor", a añadi.
E Director di OPS/PAHO a destaca e papel clave cu e organisacion tabatin den yuda e paisnan na yega na e lugar ey. Esaki ta inclui e creacion y fortalecimento di e Red Regional di Vigilancia Genomico di COVID-19, cu ta clave pa sigui e evolucion di e virus, como tambe pa vigilancia di otro patogenonan cu potencial pandemico, inclui la griep di parha. Den e ultimos tres aña, e red a facilita e introduccion di mas di 580.000 secuencia di Latinoamerica y Caribe den basenan di dato mundial.
Dr. Barbosa tambe a destaca e papel cu OPS/PAHO a desempeña den e distribucion di vacunanan COVID-19 "movilisando mas di 160 miyon dosis a traves di COVAX y yudando e paisnan di Latinoamerica y Caribe na distribui mas di 1.300 miyon dosis di vacuna den menos di dos aña".
A pesar di e logronan aki, Dr. Barbosa a advirti cu "COVID-19 ainda ta meymey di nos y e virus ainda tin cu establece su mes den un un patronchi predecibel".
"A lo largo di e ultimo luna, nos a wak mas di 1,5 miyon di casonan nobo y 17.000 morto", e Director di OPS/PAHO a indica. "Nos no por ta complaciente".
Dr. Barbosa a advirti cu, aunke e tasanan di deteccion a disminui, ta crucial pa e paisnan mantene y sigui reforsa e vigilancia, ya cu e virus SRAS-CoV-2 "por evoluciona y adapta su mes rapidamente".
Alcansa e 30% di personanan cu ainda no a ricibi e serie primario di e vacuna COVID-19 tambe ta clave pa "prepara pa cualkier ola nobo di e infeccion of un variante nobo preocupante".
Maske e Region a experimenta diverso contratiempo a lo largo di e pandemia cu a "revelado of pone den evidencia e debilidadnan di nos sistemanan di salud", incluso den e deteccion y tratamento di malesanan manera tuberculosis y HIV, den e pruebanan y e tratamento di malesanan no transmisibel; y den e descenso di e tasanan di vacunacion sistematico, awor nos tin un oportunidad unico pa "pone e salud central den e Agenda di Desaroyo Sostenibel", Dr. Barbosa a expresa.
