Bon trabou di Cuerpo di Polis sigur merece di elogio - *Den pasado turistanan a bati alarma pa placa cu nan a perde
ORANJESTAD (AAN) — E forma cu Cuerpo di Polis a gara ladronnan cu a horta placa di Pueblo na ATM, sigur merece un elogio.
E crimen cu a haya nomber di “skimming” sigur ta despreciabel pasobra ladronnan ta penetra riba cuentanan bancario di clientenan di banco pa asina horta loke otro a traha pa nan por uza pa nan come y existi.
Pa por practica skimming, e ladronnan mester tin algun conocemento di e tactica, cu nan ta emplea pa nan por mishi cu placa cu un Pueblo cu un mayoria decente, ta gana cu nan trabou limpi.
Aki no ta trata di un persona cu hamber, cu ta pone su mes na riesgo y ta horta un pan na un supermercado.
Aki ta hende, cu mester busca informacionnan concreto pa medio di tecnica special cu cual nan por “skim” e sistema pa asina bay cu e “crema” di lechi.
Esaki ta e esencia di “skimming” cu ta nifica cu ta saca di e parti cremoso di lechi of e parti importante di otro likido.
Pues e ladronnan mester conoce e tecnologia cu e practica aki ta rekeri y mester ta capaz pa hunga cu informacionnan cu nan ta capta di nan victimanan, cu no ta na haltura cu for di nan bista nan placa ta wordo horta.
Penetra den cuenta bancario di otro hende, no ta algo facil sigur si tene na consideracion e medidanan di seguridad cu banconan ta tuma pa evita cu nan clientenan ta bira victima di ladronnan den un tempo cu hende ta no ta cana cu sumanan importante cu por wordo horta den un asalto por ehempel.\
Skimming ta wordo practica dor di ladronnan, cu mester studia con pa yega na e placa cu ta deposita na banco.
Cada caso di ladronicia, cada crimen, sinembargo tin un impacto riba hende.
Den e caso di skimming na diferente forma, ta afecta hende.
Na prome luga e hende cu tin un cuenta bancario ta wordo afecta. Na segundo lugar ta afecta e sentido di seguridad di un banco cu den e caso aki a duna prueba, cu ta dificil pa perhudica su clientenan debi na e medidanan cu e ta tuma pa seguridad di nan placa.
Awe nos mester aplaudi e forma cu Cuerpo di Polis a actua, e forma cu a manda un mensahe cla pa ladronnan, cu autoridad por para criminalnan cu kier keda desconoci, tambe.
Den pasado turistanan a bati alarma riba internet pa skimmers cu a uza tarhetanan fraudulente na Aruba pa asina saca nan placa.
Esaki ta nifica cu e accionnan aki, ta crea mal nomber pa Aruba cerca turistanan tambe loke ta afecta economia di e pais.
Na Aruba den pasado sentencianan a cay pa e crimennan aki den Corte, pero aparentemente ainda tin baliente cu ta kere cu nan por horta placa di hende, cu no ta na haltura cu nan tarheta a wordo copia.
Bon trabou pues di autoridad y tambe elogio cu pa e seguridad na banco.
