ORANJESTAD (AAN): Sigur un bon noticia ta loke a wordo suministra den fin di siman! Musiconan di Aruba ta hayando chens di haya mas fanatico, y alavez un chens pa nan cancion wordo toca na un emisora na Miami (Florida).
Departamento di Asuntonan Economico, Comercio y Industria y su unidad Exprodesk ta invita tur musico pa participa na e campaña di “Miami's 88.9 FM WDNA Broadcasting Radio”.
Si bo ta un musico y bo ta pensa riba e posibilidad pa extende bo carera, esaki ta bo oportunidad pa Bo resona den exterior y crea un ‘fan base’ mas grandi.
DIARIO a compronde cu e campaña a cuminsa dia 24 di september 2021 caba, y lo sigui te cu Diasabra 9 di october 2021 y lo ta completamente gratis pa participa.
E campaña “WDNA” ta un campaña unda cu Exprodesk ta duna nos musiconan local e oportunidad pa nan propio composicion resona na Florida y asina duna nan e oportunidad di por expande nan musica na un otro nivel. Tur musico di tur genero lo por participa na e campaña aki.
Pa participa, ta pidi tur musico cu ta interesa pa primeramente inscribi nan cancionnan na Oficina di Propiedad Intelectual pa nan por ta protegi bou di e derecho di autor.
Siguientemente ta pidi pa esnan cu kier manda nan cancionnan, pa haci esaki via un MP3 audio file hunto cu nan link di YouTube si acaso nan tin videonan. Tur musico mester manda nan canticanan/audio files prome cu dia 9 di october 2021 na: This email address is being protected from spambots. You need JavaScript enabled to view it.
Di e manera aki Exprodesk tin como meta pa promove e musiconan Arubano di tur genero door di expone e cancionnan local riba mercado internacional. Di e manera aki tambe Exprodesk ta contribui na e desaroyo di e Industria Creativo door di promove exportacion di creaccionnan di artistanan, brindando nan e oportunidad pa saca probecho di nan talento y creatividad.
Ta importante pa menciona cu Exprodesk no lo ta esun cu lo bay selecciona e canticanan di e campaña aki, sino e locutornan di “WDNA”. Exprodesk ta facilita pa ricibi e canticanan y manda esakinan pa e radio di “WDNA” na Florida. “WDNA” lo bay ta esun cu lo scohe e musiconan cu nan lo presenta den e luna di oktober.
