ORANJESTAD (AAN): E dudanan relaciona cu seguridad y eficacia di vacunanan contra COVID-19 den muhernan na estado hopi biaha ta enfoca si e inmunidad di e mamanan lo wordo transferi na su yiunan durante embarazo.
Investigadornan di Universidad di New York a asegura cu muhernan na estado cu a haya un vacuna contra COVID ta transmiti e proteccion na e babynan.
Pa realiza e estudio publica den American Journal of Obstetrics and Gynecology, investigadornan a examina muestranan di sanger di 36 baby naci di mamanan cu a haya vacuna Pfizer/BioNTech of Moderna y resultadonan a mustra cu tur tabatin anticurpa cu ta combate SARS-CoV-2.
“E mamanan di recien naci cu a haya e di dos dosis di e vacuna mas di 20 siman prome cu parto. Tres muher tabatin un intervalo desde vacunacion hasta cu parto di mas di 20 siman”, e autornan di e investigacion a indica, nan tambe a señala cu mamanan cu a ricibi e vacuna den di dos mitad di nan embarazo tabatin nivelnan mas halto di anticurpa den sanger di su cordon umbilical.
E investigadornan a insisti cu e hayazgo aki ta prueba cu vacunanan tin e “poder di protege dos bida y a la bes, preveni malesanan grave tanto den mama como babynan”.
Docter Ashley Roman ta un obstetra di Universidad di New York y un di e autornan principal di e estudio, y a destaca cu “si babynan por nace cu anticurpa, esaki por protege nan durante prome lunanan di nan bida, ora nan ta mas vulnerable”.
Muhernan na estado cu ta contagia cu e virus tin dos pa tres biaha mas probabilidad di duna luz na su baby prematuramente, segun algun estudio.
