Inki Richardson, presidente CBB:
ORANJESTAD (AAN)— Inki Richardson, presidente di Centro di Bario Brazil, den conferencia di prensa a splica cu scuchando cu e celebracion di Dande 2023 ta bay ta hopi diferente, a dicidi pa join Fundacion Chico Harms cu semper tin un bon link y conseho cu CBB, y Fundacion Pro Cultura Arubano tambe ta man cu man cu Fundacion Chico Harms.
“Anto nos a bin na e idea di bin cu un sketch di dande di antes. Naturalmente nos ta un solo Aruba, pero cada bario y distrito ta celebra e Dande na nan manera. Den mi caso, nos a bin cu un sketch y tin 15 hende cu ta bay present’e. Nan ta bay haci’e un solo biaha y despues nan ta disparce for di stage, na moda di bisa, pa nan bay prepara pa bay ricibi e Dande ora cu nan bin yega na bo porta”, Inki a relata.
El a sigui splica cu ta bay tin mucha chikito di 6, 8 y 12 aña. E publico ta bay wak hopi cos pret pasobra den tur ocasion pa tristeza cu por tin, tin cosnan pret ta sosodiendo, y cada bario ta uza nan lenguahe na un manera. Esey ta haci con special asina ey e tabata na Aruba, Inki Richardson a señala.
El a bisa cu nan a bin cu e idea pa otro aña, Dios mediante, nan ta invita otro bario pa presenta e sketch y asina por sa con den cada un e Dande ta wordo celebra.
Seguidamente, señora Dijkhoff di parti di APA, a bisa cu nan ta contento cu “Ban Serio” ta bay forma parti di e celebracion di Dande aki. El a splica cu Ban Serio ta un iniciativa di Aruba Tourism Authority (ATA), y un di e pilarnan primordial di dje ta cultura.
El a reitera cu nan ta orguyoso di forma parti di e show aki, pasobra nan ta carga tambe, y mantene, e cultura di pueblo di Aruba pa sigui cu ne pa e nos muchanan y e siguiente generacionnan pa nan sa kico ta e cultura di antes y te cu awe.
Di parti di SETAR tambe nan ta contento di colabora Fundacion Chico Harms, p’asina trece un bunita anochi di show di dande y a extende un invitacion na henter pueblo pa pasa bishita e actividad aki, dia 27 di December. Pa Setar como compania ta importante pa mantene Aruba su cultura bibo y nan ta contento di aporta na e show di dande aki.
Finalmente, director di Departamento di Cultura Aruba señor Dumfries a expresa cu pa DCA ta importante pa semper sostene e fundacionnan local y den e caso aki cultural-folklorico, y tambe e bunita festival di dia 27 di December awo. El a haci un invitacion na pueblo den nomber di Gobierno di Aruba y DCA tambe pa ta presencia e Festival di Dande aki den CBB.
