Meverly Romano, DIMP:
*Corda cu por cuminza paga tiki-tiki desde September
ORANJESTAD (AAN) — Departamento di Impuesto ta ofreciendo areglo di pago pa esnan cu tin debe di impuesto di vehiculo di motor te cu 2022. Aña 2023 si mester ta completamente paga, prome cu por wordo permiti pa paga 2024.
Meverly Romano, Relacionista Publico di Departamento di Impuesto (DIMP), den entrevista cu DIARIO a reitera esaki, agregando cu ta fastioso pa bisa, pero na momento cu e deadline pasa e sistema di DIMP ta bay saca un cobranza adicional, pa e automobilista, y e ta wak si no tin e mitad di aña paga, por ehemplo si e belasting di e persona ta 300 florin pa aña, e prome mitad ta 150 florin, y e sistema ta bay genera tambe un boet di 75 florin, riba e suma ey pasobra e suma ta 50 di e suma cu tin habri na e momento ey. “Esey tur ta gastonan innecesario pa un persona por carga si solamente e por cumpli cu pagonan. Ya pa un par di añanan nos ta habriendo e posibilidad di pago desde September. Kiermen, nos e sistema di pago parcial, na unda e automobilista sa caba desde September cu e por cuminza paga su number di auto, pa e aña cu ta bin y nos tin un grupo grandi, danki Dios, cu ta cumpliendo cu esey cu a haci uso di e oportunidad aki”, Meverly Romano a menciona.
El a sigui bisa cu esaki no ta obligatorio, pero un persona cu tin mas cu un auto of companianan cu tin varios auto, pa nan e ta Sali hopi mas bentahoso pa cuminza paga tiki-tiki desde September, y ora fin di Januari yega, ya e pago no ta cay asina pisa cu normal. “Kiermen, esaki ta hopi importante tene semper na cuenta cu nos tin e sistema di pago parcial. Por cuminza na 50 florin mes pa luna y asina cu fin di januari yega e debe ta completamente paga”, Romano a señala.
El a agrega cu e deadline ta dia 31 di Januari, pa paga alomenos e prome mitad di aña y despues ta sigui e di dos deadline cu ta 30 di Juni.
“Despues di 31 di Januari nos sistema ta bay saca e cobranzanan adicional cu ta inclui 50% di boet. Ta hopi importante pa tene esaki na cuenta, pasobra e ta bay financieramente dificil, si keda postpone e pago, y esaki ta algo cu nos no ta recomenda ningun persona; impuesto tey pa nos cumpli cune, y cumpli cu impuesto ta cumpli cu bo pais. Nos ta mira cu den e grupo di incumplimento, nos tin e grupo mas halto cu tin 10% of mas di incumplimento, ta e plachinan A”, Meverly Romano, Relacionista Publico di DIMP a reitera.
