Situacion peligroso di core cu scooter electrico na Palm Beach

ORANJESTAD (AAN): E ta un situacion peligroso, ora cu algun persona (posiblemente turista) ta huur e scooternan di bateria pa core cu nan rond na Palm Beach cu nan.

   E potretnan aki saca via di un Dashcam grabando video instala na windshield di un trahador di Hotel, ta mustra e situacion cu el a topa cune ora cu e tabata coriendo riba rotonde banda di Amsterdam Manor bay panort, net cerca di e area di construccion di Embassy Suites nobo.

   Aki el a bin topa cara-cara cu 3 hoben coriendo riba e battery scooternan aki, pero na su banda di caminda  Y nan no tabata riba acera, sino riba asfalt y esey a socede net ora cu tabatin vehiculo ta bin di direccion contrario tambe.

   Su Dashcam instala na e windshield a captura e imagennan aki, unda bo ta mira con peligroso e actitud di e hobennan aki tabata.  Algun tempo pasa tabatin reclamo cu e scooternan aki ta moviliza riba walkway di peaton dilanti Highrise Hotelnan, te cu a pidi pa compania cu ta huur esakinan via un App, pa informa nan pa no core eyriba.

   Ok, awor e hobennan ta core riba caminda pero pa colmo ta haci esey na e banda robez.  Tabata trata di dos hoben masculino, y e ultimo tabata femenino.  E trahador di Hotel cu a graba esaki, a indica cu el a haye ta slow down inmensamente pa asina pasa banda di nan.  Pasobra manera e potretnan ta mustra, e prome hoben tabata hasta move un tiki mas paden riba caminda.