ORANJESTAD (AAN): Manera DIARIO a anuncia diabierna, e yiu di tera Dr. Jose Sprok, a wordo nombra Decano di Medicina na Universidad de Ciencias Medicas (UCIMED) na Costa Rica.
Dr. Sprok, den un entrevista cu DIARIO, a comparti e tremendo logro aki cu e comunidad di Aruba indicando cu diamars awor e lo ocupa e posicion di liderasgo aki den e mesun universidad unda el a cuminsa su estudio di Medicina hopi aña pasa, su Alma Mater.
El a conta cu el a studia na e universidad aki tempo cu esaki tabata Universidad Autonoma di Ciencias Medicas afilia na UACA. E tempo aya tabata tin solamente e carera di Medicina. Tempo despues el a bira UCIMED, ora cu ademas di Medicina nan a cuminsa ofrece careranan manera Farmacia, Microbiologia, Enfermeria, Fisioterapia y tambe specialidadnan medico manera Medicina Familiar (Huisarts), Ginecologia/Obstetricia y Gerencia Hospitalario.
Despues di a studia Medicina, Dr. Sprok a haci loke nan ta yama Servicio Social pa despues inicia cu su specialidad di Vascular Periferico y Ciruhia Cardiovascular.
Sprok a bay Hulanda tambe y ora el a bin bek el a cuminsa na e servicio di Ciruhia Cardiovascular Cardiaco na Hospital San Juan de Dios unda el a bira e hefe di e departamento.
Mientrastanto, e parti academico a permanece ya cu tur dia tin studiantenan , residentenan y internonan. Dr. Sprok mes a duna les varios aña na universidad y e tabata tin bao su encargo tambe algun seminario di ciruhia.
Tambe como specialista e tabata coordinador di e programa di post-grado di Ciruhia Cardiovascular di torax durante 4 aña den un convenio entre CENDEISSS (Centro de Desarrollo Estratégico e Información en Salud y Seguridad Social) y Universidad di Costa Rica (UCR).
Dr. Sprok a confronta algun reto door di un problema di salud cu ta regarda un limitacion visual. El a sali for di Hospital San Juan de Dios ya cu e no tabata por haci operacionnan mas.
Di e manera aki el a drenta den e sector di medicina priva na un otro hospital unda el a traha 3 aña mas. E aña aki el a sali for di e hospital aki unda e tabata hefe di servicionan clinico (ekivalente na e posicion di subdirector di e hospital, cual tabata parti den 2 hospital y 2 clinica grandi na San Jose y como 4 clinica na diferente area rural na Costa Rica).
Den corto, Dr. Sprok tin 17 aña di experiencia como medico gerencial den e area hospitalario y extra hospitalario y 13 aña como academico na e Facultad di Posgrado di Universidad de Costa Rica.
Dr. Sprok ta un specialista den Ciruhia di Torax y Cardiovascular cu un Master den Gerencia di Salud di ICAP, gradua como medico general di UCIMED, naci y lanta na e bario di Washington, aki na Aruba.
Pa finalisa, e specialista a remarca cu na Aruba tin varios docter di Aruba cu a gradua na UCIMED of otro universidad na Costa Rica. "Nos tur ta exitoso definitivamente y e hecho cu ami ta yegando ta papia pa su mes di e exitoso cu nos ta como docter y como profesional", e medico a expresa.
"Teniendo un arubiano como e maximo autoridad den medicina na UCIMED, cu ta e universidad priva mas bieu di Medicina, mi ta kere cu apart di ta un honor pa mi, pues definitivamente ta algo importante pa Aruba y ta papia pa su mes di e calidad di estudio tambe na Costa Rica", a agrega.
