Si no a baha Gobierno pa motibo desconoci awe lo no tin formacion
*Formacion awe mester ta basa riba urgencia pa atende cu peliger
*Guera di petroleo ta culmina y ta amenaza turismo di Aruba
ORANJESTAD(AAN)—Prome cu Covid-19 a bati na porta di mundo, tabata conoci cu supuesto salida di petroleo, cu ta domina economia mundia, lo a conduci na situacionnan internacional serio.
Despues di Covid-19 por a mira un mundo confrontando un situacion di recesion pisa, cu milagrosamente no a realiza.
Stabilidad mundo no a conoce nunca mas cu incidentenan mundial, cu continuamente ta produci, incidentenan sumamente serio.
Manera na hopi ocasion DIARIO a splica, tras di e problemanan mundial serio ta sconde un gigante cu tin e nomber di “petroleo”, e enemigo hasta di bienestar di naturaleza y di humanidad pero cu pa su balor financiero, no por kita for di economia mundial, cu ta produci pan di cada dia di hende.
DIARIO cu luho di detaye a splica Aruba semper cu ora ta papia di podernan petrolero mester mira e gigantenan manera Merca, Rusia y tanto nombernan cu normalmente no ta wordo directamente asocia na nan rikeza na petroleo.
DIARIO na momento cu Ukraine a wordo invadi, a papia di e camponan di petroleo di Ukraine mescos cu reservanan enorme di petroleo na Israel y paisnan Arabe.
Aruba ta un pais chikito y mester continuamente contempla sucesonan na un mundo cu for di e atake di Covid-19 na 2020, nunca mas a conoce normalidad.
Awe atrobe mundo ta na suspenso y por mira con Europa, e continente na otro banda di Oceano Atlantico na cual Aruba ta directamente ta uni como teritorio Hulandes, ta den un situacion serio y ta den un confrontacion abierto cu Merca, cu ta e pais cu ta entrega turista na economia di Aruba.
Den e situacion aki, Gobierno di Reino cu ya den un serie di problema mester entrega Miyones y Miyones na asistencia na Oekraine, naturalmente ta tene bista dirigi ariba Aruba pero mester duna prioridad na su mes, sigus si den e situacion actual, pensamentonan no solamente entre nacionnan, pero general, ta sumamente dividi.
Aruba na e momentonan aki mester di un gobernacion cu no ta bay mira con e ta produci mas y mas voto pa esnan na poder, pero ta percura pa den e situacion actual, hustamente weganan politico cu tanto a afecta Aruba, wordo elimina pa Aruba por confronta e situacion mundial.
Manera ya bisa e mercado principal di economia di Aruba, cu ta keda Merca, ta den problema serio mescos cu e pais mas grandi di Reino Hulandes mientras ta conoci cu e Arubiano cu nacionalidad Hulandes, sigur si e ta biba na Hulanda, mester honra su nacionalidad si e situacionnan ta exigi esaki.
DIARIO no ta bati alarma falso y nos a trata na permiti Aruba goza di dushi dianan di Carnaval.
Awor tur hende mester carga nan responsabilidad y mester percura pa Aruba tin un gobierno cu no ta demisionario pero por tuma tur medida cu mester tuma den tur situacion.
Ta bon pa comprende cu awor partidonan cu a manda gobierno di Evelyn Wever-Croes cas sin motibo ultra valido den e situacion actual, mester carga nan responsabilidad.
Aruba ta parti di mundo, cu awe ta confronta un situacion serio y mester haya e atencion pa bienestar di cada Arubiano cu ta bini na prome lugar den un sistema democratico!
