Mas validez pa posicion DIARIO enfrente promesanan campaña electoral
*Alarma mundial oficial pa guera cu lo afecta economia na forma serio
*Den formacion e peligro di confrontacion internacional mester ta central
ORANJESTAD (AAN) — Prome cu Aruba a bay urna electoral, DIARIO a adverti partidonan politico cu na 2024 no por hunga wega politica cu ningun grupo den comunidad debi na e situacion mundial serio cu ta indica cu cualkier momento un incidente internacional por presenta prome cu e prome 25 aña di Siglo 21 pasa pa historia.
Honestidad ta e prome deber di politiconan enfrente Pueblo, cu ta pone nan confianza den politiconan cu den e sistema democratico no mester mira na prome lugar con nan por haya puesto halto den gobernacion y asina placa den nan cartera, pero na prome lugar mester mira bienestar di e votador di tur edad.
A pesar di advertencia serio cu DIARIO a lanza, eleccion 2024 atrobe a produci promesa politico na Pueblo di Aruba y sigur na hustamente esnan cu mas ta depende di sinceridad politico pa nan bienestar.
DIARIO durante ultimo dianan, en preparacion di Pueblo di Aruba pa cambio di aña, mester a realisa analisisnan y estudionan relaciona cu e capacidad di Aruba pa por confronta loke actualmente tin den porta di mundo, cu ta un guera internacional, pa no uza e palabra mundial.
Ta tristo cu personanan cu ta considera nan mes esnan yama pa bay dirigi Pueblo y asina goza di salarionan cu Pueblo ta paga pa politiconan den Parlamento y den Gobernacion, no a presenta nan pakete di medidanan cu nan lo tuma, si en caso mundo conoce peligro di guera internacional prome cu Aruba por bay eleccion atrobe.
Priminti cualkier grupo di comunidad, manera anciano, adelanto financiero grandi pa asina por a haya voto durante eleccion, ta duna prueba atrobe di e calidad di politiconan cu no ta informa Pueblo na forma honesto y no ta splica Pueblo cu na e momentonan aki paisnan grandi na mundo, incluso Hulanda, manera DIARIO a adverti, mester aumenta nan capacidad pa nan por bay guera!
Mientras Pueblo di Aruba tabata acudi na urna electoral, na Medio Oriente y na Europa, guera ta e horor cu ta sigui plama y cu a haci cu oficialmente e ex Prome Ministro di Hulanda y awor e Secretario General di NATO a adverti, cu e momento a yega pa mundo cuminsa atende cu e posibilidad di guera durante e proximo añanan.
Pues ta papia di e periodo prome cu Aruba lo conoce su proximo eleccionnan y di e periodo den cual Reino a splica Aruba, cu e no por regresa na e politica di Mike Eman pa cumpra curazon di Pueblo cu weganan politico, cu ta destrui e posibilidad pa Aruba por actua, manera ya a wordo demostra ora Aruba no tabata tin reserva pero debe cu Mike a crea, ora pandemia a bati na porta.
Manera ya bisa oficialmente Mark Rutte, ex Ministro Presidente di Hulanda y awor e Secretario General di e Organisacion Transatlantico NATO forma pa Europa y Merca, a adverti cu e paisnan Europeo y tambe Merca mester cuminsa prepara pa guera.
Cu esaki DIARIO ta uza e palabranan cu Mark Rutte mes a uza cu ta cu mundo mester ta prepara pa un situacion di guera mundial y cu paisnan grandi mester cuminsa inverti sumanan enorme den defensa pa por confronta loke ta na caminda.
Situacionnan serio ta wordo registra den e temporada aki cu ta temporada cu ya mundo ta prepara pa Dianan di Fiesta oficial, cu na 2024 ta wordo marca pa horornan cu ta presenta na un forma creciente.
Hunto cu expertonan DIARIO ta analisa tambe e situacion Hulandes, cu pa loke ta trata gobernacion interno di e pais Hulanda mes, ta representa un problema enorme cu ta pone e stabilidad di Gobierno Hulandes tambe den zona di peligro.
E hecho cu Geert Wilders ta keda e lider mas popular na Hulanda cu un sosten stabil cerca votadornan, ta haci cu ainda Hulanda no a cay den un instabilidad politico serio, aunke varios otro partido politico di Hulanda ta den situacion dificil.
Sin stabilidad politico garantisa, Hulanda sigur na e momentonan aki no tin tempo ni recurso pa bay atende problemanan cu politiconan di Aruba por crea den un economia mundial cu ta depende na prome lugar di e posibilidad di guera internacional.
E prome sector, cu manera DIARIO a splica lo wordo afecta si e tension mundial sigui crece y cualkier explosion cu ta posibel den e tension actual surgi, lo ta turismo.
Sigur pa paisnan chikito manera Aruba esaki lo bira problema pasobra Aruba ta depende completamente di exterior pa loke ta trata su economia cu mester produci e placa necesario pa por goberna e pais.
DIARIO prome cu eleccion a pidi politiconan pa tene cuenta cu e situacion mundial actual, loke no a socede cerca partidonan conoci pa nan aventuranan cu den pasado a destrui Aruba pero cu nan ta sigui crea, abusando di e posibilidad social cu entre otro aumento di edad ta crea rond mundo.
Mientrastanto e situacion mundial, cu por impacta economia di Aruba directamente, ta sigui empeora mientras mundo oficialmente ta prepara pa guera, loke mester bira base pa e contenido di un gobernacion nobo pa Aruba.
DIARIO lo sigui informa.
