Un heroe a presenta su mes den e topico central di 2024
*E topico humano mas importante di 2024 a haya un cara
*Parti di cambio di Codigo Penal pa haci husticia cu victima
ORANJESTAD (AAN) — Manera ta costumber di DIARIO na final di un aña, e puntonan principal cu a haya atencion ta bini dilanti.
Uno di e logronan grandi di 2024 sin duda tabata e cambio di Codigo Penal, cu lo haya atencion sigur den un proximo edicion di e columna aki, cu nos kier a habri cu cara di un persona, cu ya no ta cu Aruba mas, pero a bandona e mundo aki corto tempo despues cu el a habri caminda pa comunidad comprende realmente e dolor di victimanan di abuso sexual.
E pandemia di Covid-19 na 2020 ya tabata tin como un resultado directo, e apertura di un topico, cu den historia humano di paisnan cu ta yama nan mes democratico na mundo, a contene un fayo cu demasiado victima cu a keda secreto.
Abuso sexual tabata un forma di violencia cu berguensa falso a permiti sigui crece pero a presenta su cara real ora e enciere di Pandemia a splica mundo kico ta pasa tras di portanan cera.
Na 2024, un dama cu curashi enorme, a bati na nos porta pa entrega nos e storia real di loke ta pasa cu tur esnan cu pasobra nan no tin forsa fisico pa defende nan mes ta bira victima di abuso sexual.
Hyacintha Thijsen-Trimon a rechaza berguensa falso pa e bira cara di e victimanan aki, cu na 2024 a pone tanto instancia na careda pa a base di e cambio di Codigo Penal por a aumenta e castigo di violadornan y abusadornan cu a kibra tanto bida inocente y realidad di bida di demasiado victima.
Den su declaracionnan na DIARIO, Hyacintha Thijsen a pidi pa Ley wordo cambia di tal forma cu ta posibel pa bini cu un castigo minimo, loke ta un tarea cu el a entrega nos.
Na momento cu nos a presenta e storia di Hyacintha Thijsen-Trimon y a kibra e barera di silencio di abuso humano, ainda no nos ni Hyacintha tabata consciente cu esaki lo tabata e final di estadia di un heroe na mundo.
Corto tempo despues di e publicacionnan a bira conoci cu e tabata sufri di un enfermedad incurable cu dentro di algun luna a pone fin na su estadia na mundo.
Durante su bida, a pesar di su dolor personal profundo, Hyacintha Thijsen-Trimon a sirbi otro ciudadanonan di Aruba na tur momento cu esaki tabata posibel y tabata conoci como un persona cu un curazon grandi.
Pa duna inicio na e lista di nombernan cu ta keda graba den historia di Aruba pa 2024, nos ta escoge Hyacintha Thijsen-Trimon pa habri e lista di nombernan di personanan cu a bira cara di Aruba na 2024 pa enorme apoyo na bienestar di Aruba y e Arubiano.
Tabata un honor di a conoce bo Hyacintha, Heroe di 2024!
