Parlamentario Arthur Dowers
ORANJESTAD (AAN): Parlamentario pa fraccion di AVP, Arthur Dowers, a mustra cu studiantenan di Aruba, ta sinti nan mes perdi na Hulanda pa falta di atencion adecuado di principalmente Minister Plenipotenciario Wilfrede Besaril y di Gabinete Wever Croes I y II pa atende cu nan interesnan.
“Despues di tanto aña di trabao, inversion y desaroyo tecnologico awe nos mester yega na e tristo conclusion cu awe nos studiantenan ta hopi mas mal informa y mal prepara pa nan estudio na Hulanda.
E Ombudsman Hulandes a haci un investigacion bao studiantenan di e islanan di Caribe Hulandes caminda entre otro el a yega na cierto conclusionnan manera cu ta berdad cu bida na Hulanda ta bira mas complica y tin biaha hasta hopi menos cordial.
Automatisacion hopi biaha ta kita e contacto humano directo cu e pueblo Hulandes, pues no ta solamente e studiante ta keha pero hopi ta esunnan di edad halto tambe cu tin problema cu e cambionan den sociedad.
Arubahuis mester ta consciente di e desaroyonan aki y tin e responsabilidad pa prepara nos studiantenan pa nan por tin exito ora nan bin establece nan mes y studia na Hulanda.
Mientras ex Minister Plenipotenciario Wilfred Besaril a fiesta 5 aña bao responsabilidad di EWC, a plunder Arubahuis y awe e conclusion ta, cu nos studiantenan ta mas mal para cu tawata e caso prome gabinete Wever Croes a bin na poder.
Berguensa cu awe ta bisa e studiante Arubiano pa no bay Hulanda mes pasobra Besaril a drumi y fiesta na luga di traha pa pueblo y principalmente studiantenan di Aruba.
Den tempo cu mi persona a asumi responsabilidad pa huur cantidad di camber pa studiantenan Arubiano ta sigura di un luga, pa ora nan yega Hulanda nan no cay den bashi.
Awor aki ta resulta cu Besaril a huur cas pa su mes pero pa studiante nada mes e no a yuda of a percura pa drecha esaki durante di su periodo como Minister Plenipotenciario y por conclui cu pa 5 aña caba, MEP tin nos studiantenan mas leu for di cas.
Awor cu tin reunion di IPKO na Hulanda, ta bolbe resalta e hecho lamentabel cu en realidad nada a ser regla pa studiantenan for di Aruba y cu na e momentonan aki tampoco tin algo ta ser haci pa sirbi nan interes.
Studiantenan Arubiano a mira nan situacion empeora den ultimo cuater aña y mey, ya cu en realidad mescos cu ta e caso na Aruba, gabinete Wever Croes ta carece di un vision pa atende interes di nos hendenan di Aruba.
Awor supuestamente tin un Minister Plenipotenciario suplente den persona di Ady Thijsen pero tampoco por mira cu el a trece un vision nobo, loke ta nifica politicamente cu gabinete Wever Croes no tin solucion na man pa yuda nos studiantenan na Hulanda,” Parlamentario Arthur Dowers a declara.
