Cu e meta di cumpra HFO Fuel cu descuento for di Venezuela:
ORANJESTAD (AAN) – E conferencia di prensa di gobierno, Dialuna 26 di September awo, tabata den man di Minister Glenbert Croes, Titular di Labor, Energia y Integracion.
E mandatario a informa tocante su reunion cu diferente representante di e Gobierno Mericano, cu e meta di pidi, atravez di nan diferente departamentonan, nan consideracion, comprension y apoyo pa e peticion di Gobierno di Aruba. E peticion aki ta pa Merca por yuda Aruba pa cumpra HFO na prijs cu rebaho for di Venezuela.
Minister Croes a bisa cu, basicamente, e solicitud di Gobierno di Aruba ta en bista di e dinamica di e relacion di Gobierno di Merca cu e Gobierno di Venezuela y cu e paisnan den Caribe no ta exento di e crisis energetico y su consecuencianan di prijsnan halto di energia, awa y coriente, entre otro, cu ta afectando nan pueblo y nan economia fuertemente. Minister Croes a bisa Gobierno di Merca, respetando kico ta e dinamica di su relacion cu Venezuela cu tin un Caribe, pero el a enfoca riba Aruba, cu ta pasando den momentonan dificil cu prijs di awa y coriente cu ta halto, door cu prijs di petroleo cu ta afecta prijs di tur otro combustible, principalmente e “heavy fuel oil” cu RDA ta cumpra, pa bende cu WEB Aruba NV, ta hopi halto.
E mandatario a splica cu e descuento cu por haya na e momentonan aki na Venezuela ta asina grandi, cu mas grandi e descuento ta, mas hopi por baha prijs di awa y coriente na Aruba.
El a sigui bisa cu obviamente Aruba ta scanning e mercado a wak unda otro posibilidadnan Aruba por tin como alternativa (por ehemplo di Ecuador), mientras tanto Aruba ta den e proceso aki cu gobierno di Merca.
Tabata dianan di reunionnan oficial cu e diferente representantenan di e Departamento di Estado, Departamento di Energia, y Departamento di Tesoro. E mandatario a bisa cu e kier a duna un reconocimento na e Embahada di Washington na Merca y na e Embahador, na Minister Plenipotenciario señora Joselyn Croes cu su team di trabao, pa tur nan reunionnan preparatorio pa nos bay e encuentronan aki cu a cuminza for di Aruba. E prome reunion aya, tabata cu e staf di Embahada di Hulanda apoyando Aruba, y esey ta haci un diferencia grandi pa un pais manera Aruba, con chikito nos por ta, pero cu e apoyo di e plataforma di Reino Hulandes, e ta duna nos un forza, un oportunidad, pa nos solicitud haya oido. “Mi ta gradici cu Gobierno Mericano tin oido, pa e clamor aki, di e solicitud aki di gobierno di Aruba”, e mandatario a subraya. Tanten cu Gobierno di Aruba haya un contesta di Gobierno Mericano, combersacionnan a cuminza cu Ecuador, na nivel di e companianan gubernamental di Aruba y Ecuador. Por lesa tocante esaki den otro articulo.
