ORANJESTAD (AAN): E profesionalnan cu tin un contract individual y trahando na WEB Aruba NV, a uni nan mes den Asociacion VWI,
y nan a tuma nota di e rueda di prensa di Ministro Glenbert Croes, kende a insinua cu, of ta conota, VWI ta afilia cu partido(nan) politico, en especial cu e partido di AVP.
Asocacion VWI mesora a reacciona, y ta insisti cu nan no ta afilia na ningun partido politico, VWI nunca tabata afilia na ningun partido politico y VWI nunca lo ta afilia na ningun partido politico. VWI ta condena cu Ministro a pone un conotacion politico riba e ponencianan di VWI.
“Nos vereniging VWI a trece nos preocupacionnan netamente den e indole di e violacion di e Corporate Governance entre Utilities Aruba NV y WEB Aruba NV den cual Utilities Aruba NV ta haci actonan cu ta fuera di e meta di su statutonan y di cual Utilities Aruba NV no tin vergunning pa haci actonan comercial manera den mira cu e Expresion Of Interest pa cu e expancion di molina di biento na Rincon.”
“Ta bisto cu Glenbert Croes, un biaha mas, ta recuri na politikeria barata pa motibo di falta di argumentonan concreto y valido. Nos ta reta Sr. Glenbert Croes hunto cu Sr. Rojer pa elimina e Non-Disclosure Agreement cu tin riba e rapport di Project Consult Global S.A. y hacie publico pa asina nos por elabora riba e contenido den detaye publicamente.”
Pa reacciona riba locual Sr. Glenbert Croes ta insinua sin base, lo siguiente: “VWI a bini den existencia na December 2018. Prome cu e fecha ey VWI-vereniging no tabata existi.
Manera ta conoci, recien Asociacion VWI a mustra nan sorpresa cu Utilities Aruba NV ta haci uso di un compania fantasma di Panama pa traha un rapport importante cu ta asina amateur traha, y a hasta mustra cu studiantenan di Colegio EPI na Aruba mes ta traha mucho mihor rapport ora di nan core stage na WEB Aruba NV.
